Jeńis Qasymbek jolaýshylardy áýejaılardaǵy tekseriske túsinistikpen qaraýǵa shaqyrdy
«Meniń suraǵym azamattyq avıatsııaǵa qatysty, naqtylap aıtqanda áýejaıda jolaýshylardy tekserýge baılanysty bolyp otyr. Qazirgi kezde muqııat tekserý júrgizilýine kóptegen azamattar alańdaýshylyq bildirýde. Sebebi, aıaq kıimdi, syrt kıimderdi sheshýge májbúr etedi. Árıne, bul qadamdar qaýipsizdik sharalary turǵysynda atqarylyp jatqandyǵyn túsinemiz, degenmen osy baǵytta zamanaýı tehnologııalardy engizý múmkin be? Sebebi aldymyzda halyqaralyq dárejede ótetin EKSPO-2017 kórmesi kele jatyr. Osy oraıda elimizge saparlaǵan qonaqtardyń aldynda yńǵaısyzdyq týyndamaı ma?»,-dep surady depýtat Gennadıı Shıpovskıh Májilistegi Úkimet saǵaty barysynda.
Óz kezeginde QR Investıtsııalar jáne damý mınıstri Jeńis Qasymbek shynymen de jolaýshylarǵa aıaq kıimdi, syrt kıimdi, beldikti sheshý unamaıtyndyǵyn aıtty.
«Biraq qazirgi zamannyń talaby solaı. Osy oraıda qaýipsizdik turǵysynda kólik nysandarynda bundaı tekserý qajet. Elbasynyń tapsyrmasymen eń úlken 9 áýejaıǵa aǵymdaǵy jyly qajetti jabdyqtardy ornatamyz. Bıyl birinshi kezekte Astanadaǵy jańa termınalda sońǵy býyndy quraldar bolady. Atap aıtqanda, bul quraldar IKAO standarttaryna sáıkes keledi. Bıyl toǵyz áýejaı boıynsha osy baǵyttaǵy jumystarǵa bıýdjetten 1,8 mlrd. teńge bólindi»,-dedi mınıstr.
Osy oraıda ol atalǵan jumystar ári qaraı jalǵasatynyn aıta kele: «Degenmen jolaýshylar túsinistikpen qaraýy kerek. Bul sharalar bizdiń emes, qazirgi zamannyń talaby bolyp otyr»,-dedi.