Jeńis Qasymbek Jezqazǵanda sý máselesin shuǵyl sheshýdi talap etti

QARAǴANDY. QazAqparat - Qaraǵandy oblysynyń ákimi Jeńis Qasymbek jezqazǵandyqtardyń kommýnaldyq máselelerge qatysty shaǵymdaryna jaýap berdi. «Úıtas-Aıdos» sý qubyryndaǵy apat saldarynan qala turǵyndary aýyz sýsyz qaldy, dep habarlaıdy QazAqparat tilshisi.

Jaǵdaı áleýmettik jelilerde úlken talqyǵa aınaldy. Adamdar tasymaldanatyn sýdyń jetispeýshiligine shaǵymdanýda.

«Qala turǵyndarynyń birneshe kún aýyz sýsyz qalýy — keleńsiz jaǵdaı. Biz jylytý maýsymyna daıyndyq týraly aıtamyz. Eger sizder ystyq sý bere almasańyzdar, qandaı daıyndyq týraly sóz qozǵamaqsyzdar? Ol azdaı, sýyq sý máselesi de ótkir bolyp tur. Meniń qabyldaý bólmemde sý tasymaldaýmen aınalysatyn uıymdaryńyzdyń jumys sapasy boıynsha kóptegen qońyraýlar jınalyp jatyr. Búgin bul máseleni sheshý úshin jumys isteńizder», - dedi Jeńis Qasymbek.

Jezqazǵan qalasynyń ákimi Qaırat Begimov túnde sý taratqyshtaǵy aqaý joıylǵanyn jáne qazirgi ýaqytta qubyrdy iske qosý jumystary júrgizilip jatqanyn baıandady.

Oblys ákimi apatty tez arada joıýdy tapsyrdy.

Jeńis Qasymbek qol astyndaǵylardan áleýmettik jelilerdi baqylap, paraqshalardy ózderi júrgizýdi talap etti.

«Men Facebook-te jeke paraqsha ashqanmyn. Búginde bul qajetti qadam. Birinshi kezekte ol jaǵdaıdy onlaın-rejımde túsiný jáne oblys turǵyndarynyń qajettilikterine jedel áreket etý úshin qajet. Jumys aptasynyń sońynda kórip otyrǵanymyzdaı, adamdar ár túrli máselelerdi sheshýdi talap etedi. Іs júzinde barlyq ótinishter naqty sıpatqa ıe. Kóptegen pikirler aıqyn máselelerdi kórsetedi. Men sizderdi, áriptesterimdi, áleýmettik jelilerge qatysýǵa shaqyramyn. Tek paraqshany ashý ǵana emes, halyqpen jumys isteý qajet. Búgingi tańda kóptegen máselelerdi qolmen sheshý kerek. Tapsyrmany joǵarydan kútpeńizder, ózderińiz jedel sheshim qabyldańyzdar», - dedi oblys ákimi.