Jeńis Qasymbek Jáıremdi damytý boıynsha tapsyrma berdi

JÁIRAM. QazAqparat – Jáıremdegi polımetall kenin qaıta óńdeý óndirisiniń qurylysy aıaqtalý satysynda, dep habarlaıdy QazAqparat tilshisi.

Qaraǵandy oblysynyń ákimi Jeńis Qasymbek kentke jumys sapary kezinde kásiporyndy aralady.

Sapar barysynda kásiporyndy iske qosý-jóndeý jumystary júrgizilip jatqany, ekinshi toqsanda ony iske qosý kútilip otyrǵany, al bir jyl ishinde óndiris jobalyq qýatqa shyǵýy tıis ekeni aıtyldy.

Jáırem polımetall ken orny - Qazaqstandaǵy eń úlken ken oryndarynyń biri. Munda qorǵasyn-myrysh, barıt-polımetall, sondaı-aq temir-marganets kenderiniń baı qory bar.

Fabrıka jumysynan bólek, oblys ákimin kenttiń damý máselesi qyzyqtyrdy. Jeńis Qasymbek Jáıremde qaıta qalypqa keltirilip jatqan bes qabatty úıdiń qurylys alańynda boldy. Ótken jyly jergilikti bılik oblystyq jáne jergilikti bıýdjetterdiń kómegimen qurylys jumystaryna kirisýge ýáde bergen bolatyn. Búginde 85 páterlik úı daıyn. Aıta ketý kerek, dál osyndaı jumys qazir Qarajalda da júrip jatyr, onda da oblys basshysy jumys saparymen boldy. Qalada kezinde bos qalǵan bes qabatty ǵımarat qalpyna keltirilýde, osy úıden basqa, taǵy bireýi retke keltiriledi dep kózdelýde. Onda 26 páterdi jóndeý, kommýnıkatsııalar júrgizý, shatyr jasaý qajet.

«Óńirde bes qabatty eki turǵyn úı qalpyna keltiriledi, bul turǵyn úı kezegin 75%-ǵa qysqartady. Jyl qorytyndysy boıynsha 150 páter tapsyrylýy tıis», - dedi Qarajal ákimi Tilektes Dosaev.

Sonymen qatar, Qarajal basshysynyń aıtýynsha, qalanyń ortalyq kósheleri asfalttalyp, jaryqtandyryldy, asfalt pen jaryq núkteleri joq jeke sektordyń 8 kóshesin abattandyrý jospary bar. Sondaı-aq, káriz jelilerin qaıta qurý jobasy ázirlenýde jáne kelesi jylǵa montajdaý jumystary kózdelgen.

«Meniń ótken saparymda №1 orta mektepte kúrdeli jóndeý máselesi kóterildi. Oqý ornynyń 50 jyldan astam qyzmet etýinde jóndeý júrgizilmegen. Sondaı-aq jańa sportzal qajet boldy. Búginde oqý ordasynda máseleniń barlyǵy sheshilip, jóndeý aıaqtaldy, mektepke sport şaly bar qosymsha ǵımarat salyndy. Endi qalanyń mindetterin odan ári sheshý kerek. Jergilikti turǵyndardyń ótinishi boıynsha Qarajaldaǵy stadıondy qalpyna keltirip, basseın qurylysyna qujattar daıyndaýdy tapsyramyn», - dedi Jeńis Qasymbek.

Sapar sońynda oblys ákimi Qarajalda da, Jáıremde de abattandyrýǵa qatysty kóp jumys atqarylǵanyn atap ótti. Ótken jyly JQJK boıynsha 11 joba iske asyrylyp, 199 jumys orny quryldy.