Jeńis Qasymbek turǵyn úı kezegine tekserý júrgizýdi tapsyrdy
Memleket basshysynyń turǵyn úıdiń qoljetimdiligin arttyrý týraly tapsyrmasyn oryndaý onlaın apparattyq keńeste talqylandy.
«2020 jyly oblys boıynsha kezekte turǵan 1 528 adam páter aldy. Onyń ishinde kommýnaldyq turǵyn úı qorynan - 897, ıpotekalyq nesıeleý baǵdarlamasy boıynsha - 102, «Qazaqstannyń turǵyn úı qurylys jınaq banki» AQ jelisi boıynsha nesıe turǵyn úıi - 124, «Baqytty otbasy» baǵdarlamasy boıynsha - 365 jáne demeýshiler esebinen - 40. Ótken jyldan bastap «Shańyraq» pılottyq jobasy boıynsha turǵyn úı qaryzyn berý bastaldy, bul - «Nurly jer» baǵdarlamasynyń jańa baǵyty», - dedi energetıka jáne TKSh basqarmasynyń basshysy Ulantaı Úsenov.
Onyń aıtýynsha, oblysta turǵyn úı máselesin sheshý jedeldetildi.
Bıyl 662 myń sharshy metr turǵyn úı salý josparlanyp otyr - bul 2020 jylǵa qaraǵanda birneshe ese kóp.
Jyl qorytyndysy boıynsha kezekte turǵan 2 900 adamǵa turǵyn úı berý josparlanýda.
«Qurylys jáne turǵyn úımen qamtamasyz etý máseleleri - óńirler ákimderi jumysynyń basym baǵyty. «Nurly jer«, «Baqytty otbasy« baǵdarlamalarynyń ýaqytyly iske asyrylýyn qamtamasyz etýdi tapsyramyn. Turǵyn úıge kezekte turǵandardyń tizimderine mezgil-mezgil túgendeý júrgizý qajet. Jańa qurylys atalmysh ındýstrııany damytýdy talap etedi. Ol úshin jergilikti óndirýshilerge qoldaý kórsetý qajet», - dep atap ótti oblys ákimi Jeńis Qasymbek.