Jeńis Qasymbek Temirtaýdaǵy qara qar týraly pikirin aıtty

QARAǴANDY. QazAqparat - Temirtaýdaǵy qara qar kún tártibinen túspeı otyr. Bul máseleni qala ákiminiń esep berý kezdesýinde turǵyndar birneshe ret kóterdi. Kezdesýge qatysqan aımaq basshysy Jeńis Qasymbek ekologııalyq jaǵdaıdy jaqsartý týraly óz ustanymyn aıtty, dep habarlaıdy QazAqparat tilshisi.

«Men árdaıym jaǵdaıdy qadaǵalap, áleýmettik jelidegi jarııalanymdardy baqylap otyramyn. Jáne de bul máseleni sheshýde men tabandylyq tanytpaqpyn. Menińshe Temirtaý ekologııasyna qatysty máselelerdiń basym bóligin biz «ArselorMıttal Temirtaý» josparynda kózdelip otyrǵandaı 2024 jylǵa deıin sozbaı, erterek sheshe alamyz dep oılaımyn. Búgin esep berý kezdesýiniń aldynda men qalany arnaıy aralap shyqtym, lastanǵan qardy óz kózimmen kórdim. Árıne, men de sizder sııaqty oǵan ashýlymyn», - dedi Jeńis Qasymbek.

Ol qala turǵyndaryna «ArselorMıttal Temirtaý» kompanııasynyń 2024-2025 jylǵa deıingi ekologııalyq jaǵdaıyn jaqsartý boıynsha jospary bar ekenin eske saldy. Alaıda, aımaq basshysynyń pikirinshe, bul sharalar jetkiliksiz.

«Al Temirtaýdaǵy lastanýdyń 80%-y metallýrgııa kombınatynan shyǵady», - dep atap ótti Jeńis Qasymbek.

Qazir oblys bıligi, kompanııa ákimshiligi men Energetıka mınıstrligi kombınatty tabıǵı gazǵa kóshirý múmkindigin talqylaýda. Bul Temirtaýdyń ekologııalyq problemasyn túbegeıli sheshýge múmkindik beredi.