Jeńis Qasymbek qaraǵandylyqtarǵa memlekettik nagradalar tabystady

QARAǴANDY. QazAqparat – Naýryz merekesi qarsańynda birqatar qaraǵandylyq elimizdiń damýyna qosqan úlesi, belsendi qoǵamdyq qyzmeti, jeke janqııarlyǵy úshin QR Prezıdentiniń Jarlyǵyna sáıkes marapattaldy.

Qaraǵandy oblysynyń ákimi Jeńis Qasymbek Memleket basshysynyń atynan ordender men medaldardy tapsyrdy, dep habarlaıdy QazAqparat tilshisi.

«Qurmet» ordenimen «Nurstroıservıs-2050» JShS basshysy, Qaraǵandy Ákeler Odaǵy fılıalynyń tóraǵasy Erkebulan Bodyqov; jeke kásipker Muhtar Jarymbetov; qoǵam belsendisi Aısultan Jaqypov marapattaldy. «Eren eńbegi úshin» medalimen Eńbek ardageri Nursahan Beısenbekova jáne Qaraǵandy oblysy penchak sılat Federatsııasynyń basshysy Maqsat Ibragımov marapattaldy.

Jeńis Qasymbek memlekettik nagrada ıelerin kele jatqan Naýryz merekesimen quttyqtady. Kezdesýge qatysýshylar olardyń eńbegi men qoǵamdyq qyzmetine joǵary baǵa bergeni úshin alǵys bildirdi.

«Keýdemdi maqtanysh kernep tur. Jerlesterime, halqymyzǵa, Prezıdentke úlken rahmet! Bul joǵary nagrada elimizge odan ári paıda ákelý, óskeleń urpaqtyń patrıottyq tárbıesine úles qosý jolynda qosymsha jaýapkershilik júkteıdi», – dedi Erkebulan Bodyqov.

«Akademık E. A. Bóketov atyndaǵy Qaraǵandy ýnıversıteti bıyl 50 jyldyq mereıtoıyn atap ótýde. Men bul JOO-da jumys istep kele jatqanyma 48 jyl boldy, óz ómirimdi jastardy oqytý men tárbıeleýge arnadym. Men eńbegimniń joǵary baǵalaǵanyna rızamyn. Biz, aǵa býyn, jastarǵa úlgi bolýymyz kerek, jastardyń óz tarıhyn, salt-dástúrin bilýi úshin eńbek etýimiz kerek», – deıdi «Tulǵataný» ǵylymı-zertteý ortalyǵynyń dırektory, ǵalym jáne pedagog Nursahan Beısenbekova.