Jeńis Qasymbek Qaraǵandy oblysynda sheshilýi tıis basty baǵyttardy atady

QARAǴANDY. QazAqparat - Qaraǵandy oblysynyń ákimi Jeńis Qasymbek oblystyq máslıhat sessııasynda birinshi kezekte sheshilýi tıis úsh basty mindetti atady. Bul - ınvestorlarmen jumys jáne bıznesti qoldaý, turǵyn úı máselesi jáne áleýmettik salany damytý, dep habarlaıdy QazAqparat.

Aımaq ákimdiginiń aqparatyna sáıkes, bıyl oblysta ınvestıtsııa kólemi rekordtyq– 650 mlrd dollar kórsetkishine jetti.

Ákimniń aıtýynsha, qarqyndy báseńdetpeý, bıznes-ahýaldy jaqsartý, «qarapaıym zattardyń ekonomıkasyn» damytý qajet. Osynyń barlyǵy ekonomıkalyq turaqtylyq pen jańa jumys oryndaryn beredi.

«Adamdar úshin ómir sapasynyń negizi turǵyn úı bolyp tabylady. Bul - óte ótkir másele. Sondyqtan qoljetimdi turǵyn úı múmkindigin qamtamasyz etýge tıispiz. Eki jylda oblysta barlyq qarjylandyrý kózderi esebinen 420 myń sharshy metr turǵyn úı salyndy. Bul, jylyna 4 300 páter degendi bildiredi. Biraq oblystyń áleýeti áldeqaıda joǵary. Biz «Nurly jer» baǵdarlamasy aıasynda memleket usynatyn barlyq múmkindikterdi paıdalanamyz. Kópbalaly otbasylarǵa páter beremiz. Turǵyn úı máselesi basty másele bolyp tabylady. Kelesi jyly turǵyn úı qurylysynyń kólemin arttyrýymyz kerek», - dep atap ótti Jeńis Qasymbek.

Oblys basshysy atap ótkendeı, áleýmettik sala da nazardan tys qalmaıdy.

«Jańa bilim berý, densaýlyq saqtaý jáne sport mekemelerine ınvestıtsııa salý - bul jaıly jaǵdaı jasaýǵa qarajat salý, qyzmetterdiń qoljetimdiligi jáne saıyp kelgende azamattardyń ál-aýqatyn jaqsartý», - deıdi ol.

Depýtattar sessııada «Nurly jol» baǵdarlamasyn júzege asyrý barysy men oblysta týrızmdi damytý máselelerin qarastyrdy. Jeńis Qasymbek osy baǵyttar boıynsha qurylǵan josparlar týraly aıtyp berdi. Onyń sózinshe, joldar sany birneshe esege artady, sonyń ishinde jergilikti joldardy jóndeý de qarastyrylǵan. Kópten kútken jóndeý jumystary Qyzylorda-Jezqazǵan jolynda da júrgiziledi dep josparlanǵan. Osy joba boıynsha JSQ ázirlenýde. Qurylys 2020 jyly bastalady. Óńir basshysynyń aıtýynsha, týrızmdi damytý ınfraqurylymǵa baılanysty jáne bul salada problemalar jetkilikti. Bıylǵy jyly Balqash áýejaıynda jańartylǵan ushyp-qoný jolaǵy ashylady. Bul rette shaǵyn avıatsııaǵa da basymdyq jasalady. Qarqaraly jáne Ulytaý aýdandarynda jergilikti áýe jelileriniń aerodromdaryn salý josparda bar. Kelesi jyly Qaraǵandydan Shymkentke jáne Alakólge áýe reısteri iske qosylady.

Sondaı-aq Jeńis Qasymbek Ulytaý aýdanyndaǵy vızıt-ortalyqtyń qurylysynjedeldetýdi tapsyrdy.