Jeńis Qasymbek elordada kólik keptelisi máselesin sheshýdiń joldaryn atady

ASTANA. QazAqparat – Astana qalasynyń ákimi Jeńis Qasymbek kólik qozǵalysy men keptelisi máselelerin sheshýde qandaı is-sharalardyń atqarylyp jatqanyn baıandap, aldaǵy josparmen tanystyrdy, dep habarlaıdy QazAqparat tilshisi.

«Maǵan jol-kólik jelisin damytý boıynsha suraqtar qoıylyp jatyr. Osyǵan baılanysty atqaryp jatqan jumysymyzǵa qysqasha toqtalyp óteıin. Qalada 430 myńǵa jýyq avtomobıl bar. Kún saıyn oblystan qalaǵa qosymsha 90 myńǵa jýyq kólik kirip-shyǵady. Jol-kólik jelisin júıeli damytý úshin kópirler, kólik qıylystary, jańa kósheler salý, jol jóndeý jumysy qarqyndy túrde júrgizilýde. Qarbalas ýaqytta kólik kóp júretin ýchaskelerdiń biri – Máńgilik el, Qabanbaı batyr, Turan dańǵyldary, Saraıshyq, Qonaev kósheleri jáne taǵy basqa», - dep jazdy Jeńis Qasymbek Instagram paraqshasynda.

Ákimniń aıtýynsha, jyl sońynda paıdalanýǵa beriletin Táýelsizdik dańǵyly boıyndaǵy jańa kópir kólik qozǵalysy máselesin ishinara sheshedi.

«Bul kópir joldardaǵy keptelisti edáýir jeńildetýge múmkindik beredi: sol jaǵalaýdy Táýelsizdik dańǵylymen, jańa temirjol vokzalymen, Qoshqarbaev dańǵylymen, Nájimedenov kóshesimen, Áziret Sultan meshitimen, Baıtursynov, Qordaı, Aınakól kóshelerimen, Momyshuly dańǵylymen jáne t.b. qosymsha baılanysty qamtamasyz etedi», - deıdi qala basshysy.

Sondaı-aq, elorda ákiminiń málimdeýinshe, kelesi jyly Táýelsizdik dańǵylynyń Qabanbaı batyr dańǵylyna deıingi jalǵasyn salý josparlanyp otyr. Aıtýynsha, bul qalanyń jańa bóligindegi Máńgilik el, Qabanbaı batyr dańǵyldarynda, Túrkistan, Kereı-Jánibek handar jáne Aıtmatov kóshelerindegi kólik aǵynyn seıiltpek.

«Sol sııaqty keler jyly Kenesary kóshesiniń boıynda (QazGıÝÝ ýnıversıteti aýdanynda) Esil ózeni arqyly ótetin taǵy bir kópirdiń qurylysyn bastaý josparda bar. Ótken jyly Uly Dala dańǵylynyń boıyndaǵy jańa kópir men A62 kóshesiniń boıynda (A91 kóshesinen Astana-Qaraǵandy tas jolyna deıingi ýchaskede) kólik qozǵalysy ashylǵan bolatyn. Bul da birneshe kóshedegi kólik qozǵalysyn jeńildetti», - dep tolyqtyrdy J. Qasymbek.

Odan bólek, shahar basshysy bıyl qalaǵa 400-ge jýyq qoǵamdyq avtobýspen tolyǵatynyn aıtty.

«Olardyń bir bóligi qazirdiń ózinde jelige shyǵaryldy. Joǵaryda aıtylǵan sharalar, onyń ishinde kósheler salý jáne jóndeý, aqyldy baǵdarshamdar ornatý jáne avtobýs jelilerin engizý qalanyń kólik jelisin aıtarlyqtaı jaqsartady», - deıdi ol.