Jeńis Qasymbek Balqashta týrıstik ınfraqurylymdy damytý jobalaryn daıyndaýdy tapsyrdy
Esterińizge sala keteıik, Balqash kóliniń jaǵalaýy respýblıkalyq mańyzy bar eń tartymdy týrıstik nysandardyń TOP-10-yna kirdi. Halyqaralyq konsaltıngtik kompanııamen birlese otyryp Balqash kýrorttyq aımaǵyn damytý jospary ázirlendi, ol Balqash, Prıozersk qalalary men Torańǵylyq jáne Shubartúbek kentterin qamtıdy. Búgingi tańda bul kýrorttyq aımaqta 53 demalys úıi men demalys oryny ornalasqan. Olar jylyna 80 myń týrıst qabyldaıdy.
«Balqash qalasyna úlken bas ınfraqurylym tartylady. Almaty tarapynan da jol qurylysy 2021 jylǵa qaraı tolyǵymen aıaqtalady. Kólik qoljetimdiligi qamtamasyz etiledi. Balqash qalasy men Aqtoǵaı aýdanynyń týrısterdi qarsy alýǵa daıyndyǵy qazirgi tańda úlken másele bolyp otyr. Qonaq úıde oryndar jetispeıdi. Óńirdi aralaý barysynda munda bar ınfraqurylym qazirgi týrıstiń qajettilikterine sáıkes kelmeıtinin baıqap otyrmyz» - dedi Jeńis Qasymbek.
Balqash qalasynyń ákimi Oraz Táýirbekovtyń aıtýynsha, sýmen jáne elektrmen jabdyqtaý boıynsha ınfraqurylymdyq jobalar eki kezeńde júzege asyrylady. Birinshisi - 2023 jylǵa deıin, ekinshisi - keıin. Búginde qalada jer telimderin túgendeý júrgizilýde. Qazir Balqash qalasynda jumys istep turǵan 10 demalys úıi, Aqtoǵaı aýdanynda - 54 demalys úıi bar.
Keńeste Balqash kýrorttyq aımaǵyndaǵy týrızmniń negizgi ósý núktesi – Torańǵylyq jáne Shubartúbek kentteriniń jaǵalaýynda ornalasqany aıtyldy.
«Onda jaqsy jaǵajaılar bar bos ýchaskeler kóp. Sondyqtan eki aýyldy bir kýrorttyq aımaqqa biriktirýge bolady. Torańǵylyq aýylynda 95 jańa úı nemese demalys aımaǵy salynady. Bul qosymsha 900 qonaq úı nómirin beredi jáne týrıstik aǵymdy ulǵaıtýǵa múmkindik beredi. 2023 jylǵa qaraı 385 nómirli 13 jańa demalys úıin salý josparlanýda. Shubartúbek kentinde týrıster úshin demalys oryndaryn damytý qajet. Sondaı-aq ınjenerlik jeliler, elektr berý jelileri, QTQ polıgony, sýmen jabdyqtaý jáne jaǵajaılardy jaılastyrý máselelerin sheshý qajet», - deıdi Kásipkerlik basqarmasynyń basshysy Tatıana Abylaeva.
Keńes qorytyndysy boıynsha, oblys ákimi Balqash qalasynyń naqty kommýnaldyq máselelerin sheshý, sondaı-aq jalpy týrızmdi damytý jóninde birqatar tapsyrmalar berdi.
«Árbir eldi meken boıynsha kýrorttyq aımaqta naqty josparlar men jobalar qajet. Olardy ázirleńizder jáne biz ony taǵy da talqylaımyz. Demalys oryndarynyń qurylysy týraly ǵana aıtyp, sonymn shektelýge bolmaıdy. Qurylys nátıjesinde jaıly jaǵdaı jasalyp, týrısterdiń sany artýy tıis», - dep atap ótti Jeńis Qasymbek.