Jeńis Qasymbek azamattardyń hattaryna jaltarma jaýap jiberetin basshylardy synady

QARAǴANDY. QazAqparat - Qaraǵandy oblysynyń ákimi Jeńis Qasymbek memlekettik qyzmetshilerdiń áleýmettik jelilerdegi paraqshalary keri baılanystyń naqty arnasy bolýyn talap etti, dep habarlaıdy QazAqparat.

Aımaq basshysy adamdar óz ótinishteri men shaǵymdaryna qatysty naqty sheshimderdiń ornyna, kózboıaýshylyq retinde jazylatyn jaýaphattar alatynyna narazylyq bildirdi.

«Adamdar jazady, biraq reaktsııa joq! Mysaly, turǵyndar aýrýhana janyndaǵy ashyq qudyqqa shaǵymdandy. Olar bul jaǵdaı týraly birneshe ret habarlady. Alaıda jaltarma jaýaptar ǵana alǵan. Qarapaıym másele úsh aıdan soń – oblys ákimdigine shaǵym túskennen keıin ǵana sheshildi. Osyndaı is-áreketter «Halyq únine qulaq asatyn memleket» tujyrymdamasyn joqqa shyǵarady. Sizderden árbir ótinishtiń jiti qaralýyn talap etemin», - dedi Jeńis Qasymbek onlaın rejımdegi apparat keńesinde.

Oblys ákimi áleýmettik jeliler keri baılanystyń tıimdi arnasy bolýy tıistigin atap ótti.

«Adamdar bıýrokratııalyq tosqaýyldarǵa tap bolmaı, sizderge tikeleı júgine alýy úshin áleýmettik jelilerge shyǵyp otyrǵandaryńyzdy eske salamyn. Kez kelgen ótinishke jaýap berińizder. Eger ózderińiz sheshe almasańyzdar, kómek surańyzdar», - dep atap ótti Jeńis Qasymbek.