Jeńilip kórmegen qazaqstandyq boksshy WBC tıtýly úshin aıqas ótkizedi

NUR-SULTAN. QazAqparat – Sharshy alańda jeńilip kórmegen jeńil salmaqtaǵy kásipqoı boksshy Elshat Nyǵmetolla (17-0-1, 5 KO) kelesi jekpe-jegi ótetin kúndi jarııa etti, dep habarlaıdy QazAqparat tilshisi.

«Sportshy 22 qyrkúıekte, Almatyda sharshy alańǵa oralady jáne WBC International Silver ataǵy úshin jekpe-jek ótkizedi. Elshattyń qarsylasynyń esimi áli jarııa etilgen joq. Boks keshin jergilikti Abat Promotion promoýterlik kompanııasy uıymdastyrady», - delingen VKontakte áleýmettik jelisindegi «Qazaqstannyń kásipqoı boksy» paraqshasynda.

Esterińizge sala keteıik, Elshat Nyǵmetolla eki jylǵa sozylǵan úzilisten keıin bıyl 12 naýryzda Dýbaıda ótken boks keshinde óner kórsetken bolatyn. Ol fılıppındik qarsylasy Djastın Darapty (10-2, 6 KO) tóreshilerdiń biraýyz sheshimimen jengen edi.

Elshat Nyǵmetolla Qytaıda týǵan. Ol 2014 jyly kásipqoı boksqa aýysyp, 2016 jyly WBO tujyrymy boıynsha Qytaı chempıony, 2018 jyly WBC tujyrymy boıynsha Azııa chempıony atanǵan bolatyn.

Foto: www.sports.kz