Jeńildikpen kredıt berýge shaǵyn jáne orta bıznes jobalarynyń pýlyn qalyptastyrý kerek - mınıstr
«Qoıylǵan mindetterdi iske asyrý úshin ortalyq jáne jergilikti atqarýshy organdarǵa ekonomıkalyq ósýdi yntalandyrýdyń tıisti qadamdaryna nazar aýdarý usynylyp otyr. Shaǵyn jáne orta bıznesti qoldaý turǵysynda «Qarapaıym zattar ekonomıkasy», «Bıznestiń jol kartasy-2025», «Eńbek» jáne Ulttyq banktiń jeńildikpen kredıt berý baǵdarlamasy aıasynda jeńildikpen kredıt berý úshin shaǵyn jáne orta bıznes jobalarynyń pýlyn qalyptastyrý qajet. Investıtsııalardyń ósýine jańa serpin berý maqsatynda ekojúıeler qurý úshin ekonomıkanyń basym sektorlarynda iri kompanııalarmen belsendi ınvestıtsııalyq kelisimder jasaýdy júrgizý kerek», - dedi mınıstr Úkimet otyrysynda bıylǵy qańtar-naýryzdaǵy qorytyndylardy baıandaı kele.
Onyń aıtýynsha, agroónerkásip keshenindegi ósýdi jedeldetý úshin qolda bar resýrstar men quraldardy tıimdi paıdalana otyryp, kóktemgi egis jumystaryn ýaqytyly júrgizýdi qamtamasyz etý kerek.
«Baǵanyń ósýine jol bermeý maqsatynda áleýmettik mańyzy bar azyq-túlik taýarlaryna baǵany turaqtandyrý jónindegi jol kartasynyń ýaqtyly jáne tolyqqandy oryndalýyn qamtamasyz etý qajet. Jumyspen barynsha qamtýdy qamtamasyz etý úshin óńirlik eńbek naryqtaryndaǵy ahýalǵa turaqty monıtorıng júrgizý kerek. Jumyspen qamtýdyń jol kartasy aıasynda turaqty jumys oryndaryn qurýǵa basty nazar aýdarylady. Joǵaryda kórsetilgen sharalardy iske asyrý, qazirgi jaǵdaıda ekonomıkalyq belsendilikti qoldaýǵa múmkindik beredi», - dedi Á. Erǵalıev.