Jeńildetilgen avtonesıe baǵdarlamasymen eń kóp satylǵan 5 kólik belgili boldy

ASTANA. QazAqparat - Jeńildetilgen avtonesıe baǵdarlamasy júzege asyrylǵan 1 jyl 7 aı ishinde oǵan qatysýshylar 7732 avtomobıl satyp aldy. Bul týraly Ortalyq kommýnıkatsııalar qyzmetindegi brıfıngte «QazAvtoÓnerkásip» Qazaqstannyń avtomobıl salasy kásiporyndarynyń odaǵy basqarmasynyń tóraǵasy Oleg Alferov málim etti, dep habarlaıdy QazAqparat.

Bul rette Qazaqstan azamattary otandyq kólikterdi satyp alýda basymdyq bergen modelder mynalar: Hyundai Elantra, Skoda Rapid, KIA Sportage, Lada 4x4 jáne Hyundai Tuscon ix35.  Onyń ishinde 1326 dana Hyundai Elantra, 834 Skoda Rapid, 656 KIA Sportage, 451 Lada 4x4 jáne 378 Hyundai Tuscon ix35  kóligi satylǵan.

«Búginde baǵdarlama qarjysy 113 paıyzǵa ıgerildi. Bul bólingen barlyq 26 mlrd. teńge ıgerilgenin jáne buǵan qosa taǵy 13 paıyz tutynýshy ózderine deıingi nesıe alýshylardyń zaımdaryn óteýin kútip kezekte turǵanyn bildiredi», - dedi Alferov jýrnalısterdiń saýalyna oraı.

Eske sala keteıik, jeńildetilgen avtonesıe baǵdarlamasy baǵasy 5,6 mıllıon teńgege deıingi qazaqstandyq avtomobılderge arnalǵan. Jeńildetilgen avtonesıe boıynsha jyldyq paıyzdyq mólsherleme 4 paıyzǵa teń, tıimdi jyldyq mólsherleme - 7,5 paıyz. Halyq bankiniń eńbekaqy jobasyna qatysýshy klıentterine aldyn ala tólem jasaý mindettelmeıdi. Al qalǵan jaǵdaılarda aldyn ala tólem kóliktiń jalpy qunynyń 10-20 paıyzyna teń. Nesıe bes jylǵa deıingi merzimge beriledi. Qosymsha komıssııa alynbaıdy. Qaryz alýshydan talap etiletin qujattar paketi - mınımaldy.