Jeńil ónerkásipti damytýǵa qatysty usynystar qaǵaz kúıinde qalyp keledi – senator
«Elimiz Prezıdenti Qasym-Jomart Toqaev 8 aqpandaǵy Úkimettiń keńeıtilgen otyrysynda óndiristi damytý, onyń ishinde óńdeý óndirisin damytýǵa basa kóńil bólý kerektigin aıtty. Shynynda da taýardy shıkizat kúıinde satqannan góri, óńdelgen taýardy satqan kezde qosymsha qun salyǵy birneshe ese artatyny belgili. El Prezıdentiniń tapsyrmasymen ótken jyly «Ónerkásip saıasaty týraly» arnaıy zań qabyldanǵan bolatyn. Osy zańnyń aıasynda ónerkásipti damytýǵa qoldaý kórsetý, ónerkásipti qamtamasyz etý máseleleriniń bári qaralǵan», - dedi Á. Qurtaev.
Onyń aıtýynsha, jeńil ónerkásip salasy da keshegi odaqtyń kezindegi Qazaqstan Respýblıkasynyń jalpy ishki ónimdegi úles salmaǵy 17 paıyzdy quraǵan bolatyn.
«Búgingi tańda jeńil ónerkásiptiń jalpy ishki ónimdegi úles salmaǵy 1 paıyzǵa jetpeı otyr. Buǵan birneshe ret Parlamenttik tyńdaý ótkizilgen bolatyn. Parlamenttik tyńdaýdyń qorytyndysy boıynsha Úkimetke usynystar da jiberildi. Ókinishke qaraı, usynystardyń barlyǵy qaǵaz kúıinde qalyp kele jatyr», - dedi senator.