Jeńil ónerkásipshiler ST-KZ úlgisindegi sáıkestik sertıfıkatyn ózgertý qajet dep sanaıdy

ALMATY. Qazannyń 21-i. QazAqparat /Erlik Erjanuly/ - Jeńil ónerkásip salasynda ST-KZ úlgisindegi sáıkestik sertıfıkaty óndirisshilerdiń jumysyna kedergiler jasaýda. Bul másele búgin Almatyda ótip jatqan "Jeńil ónerkásiptegi qazaqstandyq úles" dep atalatyn konferentsııada jan-jaqty talqylanyp jatyr.

"Qazir ST-KZ úlgisindegi sáıkestik sertıfıkatyna óndiriske qatysy az deldaldar jyldam qol jetkizýde. Al tikeleı ónim óndiretin kásiporyndar úshin bul qolbaılaý bolyp otyr. Tender kezinde kóbine-kóp óndirisshiler emes, deldaldyqpen aınalysatyndar jeńiske jetýde", deıdi "Alpamys" aıaq-kıim fabrıkasy" JShS dırektory Almagúl Saýdenova.

Onyń bul pikirin áriptesteri ǵana emes, "Jolaýshylar tasymaly" AQ-nyń Satyp alý jáne qamtamasyz etý basqarmasynyń mamandary da qoshtady. Laýazymdy qyzmetkerlerdiń aıtýynsha, tenderlerge ótinish bildirgenderdiń basym bóligi keıin óndiristik-materıaldyq bazasy joq kezdeısoq fırmalar bop shyǵýda. Áıtse de olardyń qolynda sáıkestik sertıfıkattary bar. Sondyqtan naǵyz óndirisshiler men deldaldardy aıyrýǵa ST-KZ úlgisindegi sáıkestik sertıfıkaty jetkiliksiz bolyp otyr.