Jenevada Qazaqstandaǵy múgedekter quqyǵyn qorǵaý máselesi talqylandy

ASTANA. QazAqparat - QR Eńbek jáne halyqty áleýmettik qorǵaý vıtse-mınıstri Svetlana Jaqypova bastaǵan Qazaqstan delegatsııasy BUU Adam quqyqtary jónindegi Keńesiniń (BUU AQJK) 37-sessııasyna qatysty, dep habarlaıdy QazAqparat QR SІM baspasóz qyzmetine silteme jasap.

S. Jaqypova múgedekter quqyqtary máselesi boıynsha BUU Arnaıy baıandamashysy Katalına Devandas-Agılıardyń ınteraktıvti dıalogy sheńberinde sóz sóıledi. Dıalog barysynda sarapshynyń 2017 jylǵy qyrkúıektegi Qazaqstanǵa sapary nátıjesi boıynsha daıyndaǵan baıandamasy usynyldy. Bul qujat eńbek jáne áleýmettik qamtý, ınklıýzıvti bilimdi engizý, saılaý quqyqtaryn júzege asyrý, quqyqtyq kómektiń qol jetimdiligi, sonymen qatar, elimizdegi múmkindigi shekteýli adamdardyń múmkindikteri men quqyqtaryn ári qaraı ulǵaıtý boıynsha sarapshy usynystary sııaqty Qazaqstandaǵy basty áleýmettik salalardaǵy múgedektigi bar tulǵalardyń jaǵdaıyn keshendik jáne jan-jaqty taldaýdy qamtıdy.

Arnaıy baıandamashy Katalına Devandas-Agılıar Qazaqstan Úkimetine shaqyrǵandyǵy jáne onyń mandatymen tyǵyz yntymaqtastyq úshin alǵys bildirdi. 2015 jyly ratıfıkatsııalanǵan Múgedekter quqyqtary jónindegi BUU Konventsııasy sheńbergindegi mindetterdi oryndaýdaǵy memlekettiń ósip kele jatqan beıildigi eskerildi. Óz kezeginde, mınıstrdiń orynbasary sarapshy baıandamasyna jasalǵan Qazaqstan Úkimetiniń túsiniktemelerin usynyp, múgedektigi bar adamdardyń quqyqtaryn qamtamasyz etý salasyndaǵy memlekettiń ári qaraı qadamdary týraly sıpattady.

Sol kúni Jenevadaǵy Qazaqstannyń turaqty ókildigi Katalına Devandas-Agılıarmen birlesip, Adam quqyqtary jónindegi keńesre múshe memleketter men baıqaýshy delegatsııalar, sonymen qatar halyqaralyq úkimetaralyq jáne úkimettik emes uıymdar úshin Konventsııany ımplementatsııalaý boıynsha Qazaqstannyń tájirıbesine arnalǵan is-shara ótkizdi.

Sharada Múgedekter quqyqtary jónindegi BUU komıtetiniń tóraǵasy Terezııa Degener, Halyqaralyq múgedekter alıansynyń adam quqyqtary boıynsha aǵa keńesshisi Sılvııa Kvan jáne «Shyraq múgedektigi bar áıelder assotsıatsııasy» qoǵamdyq birlestik basshysy, QR Úkimeti janyndaǵy múgedektik isteri boıynsha úılestirý keńesiniń múshesi Lıazzat Qaltaeva sóz sóıledi.

Óz kezeginde, Jeneva qalasyndaǵy BUU jáne basqa halyqaralyq uıymdar janyndaǵy Qazaqstannyń turaqty ókili, elshi Janar Aıtjanova qatysýshylarǵa  Elbasynyń jańa bes áleýmettik bastamalary týraly habarlap, olardy júzege asyrý barysynda múmkindigi shekteýli adamdardyń quqyqtaryna erekshe nazar aýdarylatyndyǵy jóninde atap ótti.