Jeneva tórinde qazaqtyń ulttyq mýzykasy oryndaldy

JENEVA. QazAqparat – Jeneva konservatorııasynyń kontsert zalynda «Turan» etno-folklorlyq ansambliniń, tenor Medet Shotabaevtyń jáne «Roza Baǵlanova atyndaǵy Qazaqkontsert» uıymy mýzykanttarynyń «Bridge of Times» kontserti ótti. QazAqparat bul týraly QR Syrtqy ister mınıstrligine silteme jasap habarlaıdy.

Jenevada ornalasqan BUU bólimshesi janyndaǵy Qazaqstannyń Turaqty ókildigi bul jobany «Qazaqkontsert» ónerpazdarymen birlesip, olardyń álemdik týrnesi aıasynda jenevalyq La Haute École de musique de Genève, le Centre d'Accueil de la Genève Internationale (CAGI) jáne les Ateliers d'ethnomusicologie (ADEM) qoldaýymen júzege asyrdy. Bul jergilikti aýdıtorııaǵa baǵyttalǵan sońǵy ýaqyttaǵy eń iri mádenı is-shara boldy.

«Turan» etno-folklorlyq ansambli qazaq halqynyń ózindik mýzykalyq ónerin, kóne aspaptardyń dybysyn jáne kómeı án ónerin jańǵyrtýǵa umtylyp keledi. Qobyz, jetigen, sherter, orteke, sybyzǵy jáne taǵy basqa 30-dan astam ulttyq mýzykalyq aspapta óner kórsetken qazaqstandyqtardy kórermen jyly qarsy aldy.

Sonymen qatar aýdıtorııa halyqaralyq baıqaýlardyń laýreaty, Qazaqstannyń eńbek sińirgen qaıratkeri, tenor Medet Shotabaevty ystyq yqylaspen qabyldady.

Ulttyq jáne klassıkalyq mýzyka aspaptary úshin jazylǵan jáne Qazaqstannyń eńbek sińirgen qaıratkeri, kompozıtor Aqtoty Raıymqulovamen birge oryndalǵan kompozıtsııalardyń oryndalýy keshtiń sharyqtaý shegine aınaldy.

Anshlagpen ótken kontserttiń sońynda qonaqtarǵa ulttyq taǵamdar usynyldy.