Jemqorlyqpen kúres kún tártibinen túsken joq – Sáken Qalqamanov
Otyrystar barysynda osy salada atqarylǵan jumystar talqylanyp, aldaǵy kezeńge arnalǵan mindetter belgilendi. Saıram aýdanynda ótken jıynǵa oblys ákiminiń orynbasary Sáken Qalqamanov, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departament basshysy Bolat Isaqov, aýdan ákimi men quzyrly mekeme basshylary qatysty.
Sharada «Qazaqstan Respýblıkasynyń memlekettik qyzmet týraly» Zańyna engizilgen ózgerister men tolyqtyrýlar týraly, sybaılas jemqorlyqtyń aldyn alý boıynsha atqarylǵan jumystar jaıly jáne memlekettik satyp alý salasyndaǵy ózekti máseleler aıtyldy.
«Elbasymyz N.Á.Nazarbaev aıtyp ótkendeı, sybaılas jemqorlyq – bul ǵalamdyq másele, odan álemniń birde-bir memleketi, birde-bir saıası júıe, birde-bir saıası tártip qorǵalǵan emes. Sońǵy jyldyń ishinde sybaılas jemqorlyqqa qatysty jazalaýlar ákimshilik deńgeıden qylmystyń eń aýyr túrine deıin teńestirildi. Zań qatańdaı tústi», – dedi Saıram aýdanynyń ákimi Ulasbek Sádibekov óz sózinde.
Byltyr óńirde alǵash ret sybaılas jemqorlyqqa qarsy halyqaralyq forým ótti. Aýqymdy jıynǵa arnaıy kelgen AQSh, Túrkııa, Ázerbaıjan, Tatarstan jáne Túrikmenstan elderiniń ýákiletti organ ókilderi, halyqaralyq sarapshylar men úkimettik emes uıym músheleri óz elderi men Qazaqstandaǵy úzdik tájirıbelermen bólisip, tyń jobalardy ortaǵa saldy. Sheteldik sarapshylardyń belsene qatysýymen ótken mańyzdy shara aldaǵy ýaqytta turaqty túrde ótkizilip turady. Sondaı-aq, óńirde «Adaldyq alańy» jobalyq keńsesiniń jumysy da jemisin berýde.
«Sybaılas jemqorlyqpen jan-jaqty kúres máselesi kún tártibinen túsken joq. Bul sanattaǵy quqyqbuzýshylyq faktileri óńirimizde de oryn alady. ıAǵnı, ákimdikter janynan qurylǵan sybaılas jemqorlyqqa qarsy is-qımyl máseleleri jónindegi komıssııalardyń jumysynyń mardymsyz júrgiziletinin kórsetedi. Osy oraıda, ishki taldaý jumystaryn sapaly júrgizýdi, qoǵamdyq qabyldaýdy turaqty túrde ótkizip, aryz-shaǵymdardy jiti baqylaýda ustaýdy tapsyramyz», – dedi oblys ákiminiń orynbasary Sáken Qalqamanov.
Basqosýda kóptegen túıtkildi máseleler sóz boldy. Aldaǵy ýaqytta, memlekettik sybaılas jemqorlyqqa qarsy saıasatty odan ári jetildirý maqsatynda oblys aýmaǵynda júzege asyp jatqan ilkimdi bastamalar men sátti jobalar ári qaraı da jalǵasyn tappaq.