Jemqorlyqqa qatysty Aqtóbe oblysy ákiminiń orynbasary eń uzaq merzimge sottaldy

NUR-SULTAN. QazAqparat – Ótken jyly asa iri mólsherde para berýge ıtermelegeni úshin Aqtóbe oblysy ákiminiń burynǵy orynbasary Mamýnov eń uzaq merzimge – 12 jylǵa bas bostandyǵynan aıyryldy. Bul týraly AntikorNEWS alańynda QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Bekaıdarov aıtty, dep habarlaıdy QazAqparat tilshisi.

2020 jyly para bergen jáne para berýge ıtermelegen 10 adam 10 jyldan astam ýaqytqa bas bostandyǵynan aıyrylǵan.

«Ótken jyly asa iri mólsherde para berýge ıtermelegeni úshin Aqtóbe oblysy ákiminiń burynǵy orynbasary Mamýnov eń uzaq merzimge – 12 jylǵa bas bostandyǵynan aıyryldy. Para bergeni úshin sottalǵandardyń 17%-dan astamy, ıaǵnı 111 memlekettik qyzmetshi bas bostandyǵynan aıyrylýdan basqa, memlekettik qyzmetten bosatylǵan jáne ómir boıy memlekettik qyzmette jumys isteý quqyǵynan aıyrylǵan», - deıdi QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Bekaıdarov.

Taldaý kórsetkendeı, kóp jaǵdaıda para berýshiler jeke kompanııanyń ókili bolyp shyqqan.

«Olar laýazymdy tulǵalarǵa para berý arqyly kásipkerlik qyzmetin qolaıly júzege asyrýǵa tyrysqan nemese memlekettik satyp alý sharttary boıynsha oryndalǵan jumystardyń aktilerine kedergisiz qol qoıdyryp almaq bolǵan. Mysaly, Ermegııaev («EKSPO-2017» UK) isi boıynsha para berýshi 7 jylǵa sottalsa, al olarǵa kómektesýshilerdiń 5 jáne 7 jylǵa bas bostandyǵy shektelgen. Sot aıyppul tóleý merzimin belgileıdi jáne aıyppul tólenbegen jaǵdaıda bas bostandyǵynan shekteý jazasy bas bostandyǵynan aıyrý jazasyna aýystyrylady», - deıdi ol.