Jemqorlyqqa baılanysty bıýdjetten tys qorda 120 mlrd teńge bar - Álıhan Smaıylov
Premer-Mınıstr Úkimet Memleket basshysynyń Saılaýaldy baǵdarlamasynda usynylǵan keń aýqymdy reformalardy iske asyrýǵa kiriskenin atap ótti.
«Onda damýdyń negizgi draıverleri retinde óńirlerge erekshe kóńil bólinip otyr. Prezıdent tapsyrmasyna sáıkes, aldaǵy jyldarda aýyldyq aımaqtardy órkendetýge basymdyq berilip, aýyl sharýashylyǵy ekonomıkanyń jańa qozǵaýshy kúshine aınalatyn bolady. Bul rette elimizdiń agrarlyq-ındýstrıaldy óńiri bolyp sanalatyn Almaty oblysynyń alatyn orny erekshe», — dedi Álıhan Smaıylov.
Jýyq arada Aýyldyq aýmaqtardy damytýdyń 5 jylǵa arnalǵan tujyrymdamasy qabyldanady. Ol aýyl ekonomıkasyn, jer qatynastaryn, jergilikti ózin-ózi basqarýdy jáne basqa da salalardy jańǵyrtýǵa baǵyttalady.
Sonymen qatar Halyqtyń tabysyn arttyrý baǵdarlamasy aıasyndaǵy jumystar, sondaı-aq bos jatqan jerlerdi memleket menshigine qaıtarý, aýyl sharýashylyǵy kooperatsııasyn damytý jáne sýarmaly jerlerdi kóbeıtý boıynsha jumystar jalǵasady.
Premer-Mınıstr áleýmettik ınfraqurylymdy damytý boıynsha da aýqymdy mindetter turǵanyn atap ótti. Bul baǵytta «Jaıly mektep» jáne «Aýyldyq densaýlyq saqtaýdy jańǵyrtý» jańa ulttyq jobalary iske asyryla bastady. Atap aıtqanda, 2026 jylǵa deıin oblysta 68 myń orynǵa arnalǵan 63 mektep jáne 38 jańa medıtsınalyq-sanıtarııalyq alǵashqy kómek nysanyn ashý josparlanýda.
«Úsh aýysymdy oqytý máselesin sheshý úshin qosymsha 9 mektep salý qajet. Qarjy mınıstrliginde sybaılas jemqorlyqqa baılanysty bıýdjetten tys qorymyz bar. Oǵan 120 mlrd teńge tústi. Ákimdik Oqý-aǵartý mınıstrligine qarajat bólýge tıisti ótinim berý kerek», — dedi Álıhan Smaıylov.
2030 jylǵa deıin Almaty aglomeratsııasyn damytý boıynsha keshendi jumys júrgiziledi.