«Jemqorlyq joıylmaı, memleket gúldenbeıdi»-respýblıkalyq basylymdarǵa sholý
***
Korrýptsııa nemese sybaılas jemqorlyq kez kelgen elde bolady, másele, onyń mashtabynda. Sheteldik ekonomısterdiń tujyrymdaýynsha, eger memleket baıyp, gúldengisi kelse, aldymen korrýptsııany joıý kerek. Máselen, Germanııa, Fınlıandııa, Shvetsııa, Shveıtsarııa sııaqty Batys Eýropanyń damyǵan elderinde sybaılasqan jemqorlyqty jeńgen, biraq qaldyqtary bolýy kerek. Álemdik reıtıng boıynsha korrýptsııaǵa boı aldyrǵan Sýdan, Nıgerııa, Túrikmenstan sııaqty elderdiń qatarynda, eń tómengi satylarda Qazaqstan turǵan kórinedi. Mine qoǵamdy jaılaǵan osy dert jaıy arqaý bolǵan maqala «Aıqyn» gazetinde «Jemqorlyq joıylmaı, memleket gúldenbeıdi» degen taqyryppen berilgen. «Korrýptsııaǵa qarsy kúres nátıjeleriniń kórsetkishterine qaraǵanda, Qazaqstanda sybaılas jemqorlyq joıylýdyń ornyna qanat jaıyp bara jatqan sııaqty», - dep jazady basylym.
«Londonda óziniń eýropalyq jolsaparynyń ekinshi kúninde Qazaqstannyń syrtqy ister mınstri Erjan Qazyhanov brıtandyq áriptesi Ýılıam Heıgpen kezdesip, eki jaqty yntymaqtastyqtyń qazirgi jaǵdaıy men damý bolashaǵy týraly sóz qozǵady», - dep jazady «Aıqyn» gazeti «Qarym-qatynas máselesi talqylandy» degen maqalasynda. Basylymnyń atap ótýinshe, taraptar saýda-ekonomıkalyq jáne gýmanıtarlyq salalardaǵy, parlamentaralyq deńgeıdegi ózara yqpaldastyq, halyqaralyq sıpattaǵy keń kólemdi máseleler boıynsha Astana men London ustanymdarynyń uqsastyǵyn atap ótip, ekijaqty qarym-qatynastardyń qazirgi damý deńgeıine rızashylyq tanytqan.
***
«Alash aınasy» gazetiniń turaqty «Dat!» aıdarynda QR TJM Tótenshe jaǵdaılardy joıý departamentiniń dırektory Dıhanbek Satylǵanovpen aradaǵy suhbat «Qutqarýshy ámbebap bolýy kerek» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Eń basty talap - qutqarýshy qandaı jaǵdaıda, qandaı apatta bolsyn qutqarýshy bolýy kerek. Qazir osyǵan kóp kóńil bólip jatyrmyz. Máselen, qutqarýshy órt sóndirýshi de, sý qutqarýshysy da, alǵashqy medıtsınalyq kómek kórsetýshi de, qysqasy, ámbebap bolýy kerek», - deıdi.
Bıyl qazan aıynyń 30-ynda Qyrǵyz elinde dúbirli prezıdent saılaýy ótpek. Onsyz da qazany ortaıǵan qyrǵyz aǵaıynǵa bul saılaý, Ortalyq saılaý komıssııasynyń habarlaýynsha, 450 mln. somǵa (10 mln. dollarǵa jýyq) túskeli tur. Ala-Too-daǵy kezekti doda prezıdent saılaýy ǵana emes, aıyr qalpaqty aǵaıynǵa taǵy da úlken syn bolmaq. Sebebi el ishin arandatyp, jik-jikke bólýge múddeli kúshter az emes. saılaý dúbiri jaqyndaǵan saıyn bılik qyrǵyz eliniń birligi men tutastyǵyn saqtaýǵa barynsha kúsh jumsap keledi. Kórshi eldegi saıası ahýal jaıynda egjeı-tegjeıli bilgińiz kelse, «Alash aınasy» gazetindegi «Qyrǵyz prezıdenttigen taıtalas nege báseń?» degen taqyryptaǵy maqalaǵa kóz júgirtińiz.
***
«Astanalyq «Beles» toby Túrkııa astanasynda ótken «Grand Ankara» festıvalinen oljamen oraldy. Aqteńiz jaǵalaýynda bir apta boıy ótken festıvaldiń qadirli qonaǵy bolyp, qazaqtyń tól ónerin pash etken «belestikterdi» Ankara qalasynyń meri Melıh Gókchek arnaıy shaqyrǵan eken», - dep jazady «Astana aqshamy» gazeti. Basylymnyń atap ótýinshe, qazaqtyń tól ónerin nasıhattap, kıeli kúı óneriniń qamqorshysy bolyp júrgen top 45 mınýt boıy ankaralyqtarǵa ónerlerin pash etken. Maqalany tolyǵymen basylymnyń búgingi nómirinde basylǵan «Beles baǵyndyrǵan beles» degen maqaladan oqı alasyzdar.
***
«Kazahstanskaıa pravda» gazetiniń jazýynsha, Óskemen tıtan-magnıı kombınaty, aeroǵarysh, qorǵanys salalaryndaǵy álemdik kóshbasshy sanalatyn EADS kompanııasy jáne UKAD qazaqstandyq-frantsýzdyq birlesken kásiporyn arasynda 2022 jylǵa deıin tıtan ónimderin jetkizý týraly uzaq merzimdi kelisimge qol qoıdy. Atalǵan qujatqa sáıkes, Óskemen tıtan-magnıı kobınaty Erýopaǵa óz ónimin jetkizbek. Qazaqstandyq ónim Airbus ushaqtaryn paıdalaný úshin de qoldanylatyn bolady. Osy joba boıynsha ınvestıtsııanyń jalpy kólemi shamamen 47 mln. eýrony quraıdy. Maqala «Letýchıı tıtan dlıa Evropy» degen taqyryppen berilgen.