Jemqorlyq qylmysqa kóbirek urynǵan memlekettik baǵdarlamalar ataldy

NUR-SULTAN. QazAqparat - 2020 jyldyń 1-toqsanynda júıeli jolǵa túsken jemqorlyqtyń 40 faktisi anyqtalyp, joly kesildi. Bul týraly QR Sybaılas jemqorlyqqa qarsy is-qımyl agenttigi Strategııa jáne jedel basqarý departamentiniń basshysy Nurlan Jaqsymbetov aıtty, dep habarlaıdy QazAqparat tilshisi.

Agenttiktiń 2020 jyldyń 1-toqsanyndaǵy negizgi nátıjelerine toqtalǵan onyń dereginshe, osy aralyqta 892 qylmystyq quqyq buzýshylyq tirkelgen. Olardyń basym bóligin, ıaǵnı 77 paıyzyn talan-tarajǵa salý men paraqorlyq quraıdy.

«Tolyqtaı alǵanda, ótken jyldyń dál osyndaı kezeńimen salystyrǵanda sybaılas jemqorlyq qylmystarynyń sany 12 paıyzǵa jýyq qysqaryp otyr. Bul oń ózgeris eń aldymen aldyn alý jumystary tıimdiliginiń artýyna jáne tótenshe jaǵdaı rejımine baılanysty boldy. Biraq, bul tizgindi bos jiberdik degendi bildirmeıdi. Búginde jemqorlyqtyń barynsha kúrdeli nysandaryna nazar aýdara tústik. Oǵan asa aýyr jemqorlyq qymystardy anyqtaý 2 ese, aýyr qylmystar 12 paıyzǵa ósýi dálel bola alady», - dedi ol.

Departament basshysynyń aıtýynsha, júıeli jemqorlyqtyń 40 faktisi anyqtaldy. Onyń aıasynda shamamen 200 qylmys tirkeldi. Ótken jyldyń birinshi toqsanymen salystyrǵanda iri kólemde talan-tarajǵa salý qylmystaryn anyqtaý 28 paıyzǵa ósti. Memlekettik baǵdarlamalardy júzege asyrý barysyndaǵy qylmystardy áshkereleý 2 esege jýyq artty. Olardyń jartysynan kóbi 2020 jylǵa deıin óńirlerdi damytý, bilim jáne ǵylym, agroónerkásip kesheni salalaryna qatysty baǵdarlamalardy júzege asyrý barysynda oryn alǵan.

«Shaǵyn jáne orta bıznes qyzmetine zańsyz aralasýdyń 48 faktisi anyqtaldy. Bul baǵytta qylmystyq-quqyqtyq sharalardan bólek bizdiń PBI (protecting business and investments) jobamyz da bızneske úlken kómek kórsetip jatyr. Búginde sybaılas jemqorlyqqa qarsy qyzmettiń súıemeldeýimen jalpy quny 12,7 trln teńgeden asatyn 451 bıznes joba júzege asyrylyp jatyr. Bul naqty bir deńgeıdegi senim kórsetkishi ekeni sózsiz», - dedi Nurlan Jaqsymbetov.