Jemqorlyq faktisin habarlaǵan turǵyndarǵa qansha qarjy tólendi

NUR-SULTAN. QazAqparat – Sybaılas jemqorlyq faktisi týraly telefon arqyly habarlaý jaǵdaılary artyp keledi. Bul týraly Sybaılas jemqorlyqqa qarsy is-qımyl agenttigindegi brıfıngte málim boldy, dep habarlaıdy QazAqparat tilshisi.

«Sall-ortalyqqa kelip túsken árbir habarlama ýaqtyly tekseriledi. Bıylǵy jyly sybaılas jemqorlyq faktileri týraly 378 qońyraý tirkeldi, habarlamalardy tekserý nátıjeleri boıynsha ashylǵan qylmystyq ister sany artýda. Eger byltyrǵy jyly nebári 32 is qozǵalsa, aǵymdaǵy jyldyń 7 aıy ishinde sotqa deıingi 31 tergep-tekserý bastaldy. Osyndaı habarlamalar boıynsha 15 adamnyń para alý kezindegi qylmysy áshkerelendi. Olardyń arasynda quqyq qorǵaý organdarynyń qyzmetkerleri, jergilikti atqarýshy organdardyń jáne bilim berý salasynyń qyzmetshileri bar. 5 adam sottaldy», - dedi Agenttiktiń Ákimshilik-quqyqtyq departamenti qujat aınalymy basqarmasynyń basshysy Qýanysh Myrzaǵalı.

Onyń sózine qaraǵanda, sybaılas jemqorlyq quqyq buzýshylyqtar týraly habarlaǵan nemese qylmysqa qarsy is-qımylda ózge de jolmen járdemdesken azamattarǵa birjolǵy aqshalaı syıaqy tólenedi. ıAǵnı, eger kináli adamǵa qatysty sottyń ákimshilik jaza qoldaný týraly qaýlysy nemese aıyptaý úkimi zańdy kúshine engen bolsa, tıisti yntalandyrý eskerilgen.

Taratylǵan málimetke qaraǵanda, bıyl sybaılas jemqorlyq quqyq buzýshylyqtar týraly, onyń ishinde call-ortalyq arqyly habarlaǵan 116 azamat 17,7 mln teńge somasynda yntalandyryldy.

Budan buryn habarlanǵandaı, Sybaılas jemqorlyqqa qarsy is-qımyl agenttiginde el turǵyndary qaı salalardaǵy zańsyzdyqtar boıynsha kóbirek shaǵymdanatynyn jarııa etti.