Jemqorlyq faktisi týraly habarlaǵan 7 qostanaılyq syıaqy aldy

QOSTANAI. QazAqparat – Qostanaı oblysynda sybaılas jemqorlyq jáne para alý qylmystary boıynsha memleketke 457 mln teńge shyǵyn keltirilgen, dep habarlaıdy QazAqparat oblystyq sybaılas jemqorlyqqa qarsy kúres departamentiniń baspasóz qyzmetine silteme jasap.

Búginde atalǵan qarajattyń 414 mıllıon teńgesi qazynaǵa qaıtarylǵan. Jyl basynan beri bilim berý, densaýlyq saqtaý, turǵyn úı kommýnaldyq sharýashylyǵy jáne qurylys salalarynda qylmys jasaǵandar tirkelgen.

«Osy salalarda sybaılas jemqorlyq qaýipti deńgeıge jetip otyr. Jyl basynan beri 86 qylmys tirkelgen. Memlekettik satyp alý júıesi boıynsha da zań buzýshylyqqa jol beriledi. Bul baǵytta «Qostanaı – adaldyq alańy» jobalyq keńsesi monıtorıng júrgizedi. Sonyń nátıjesinde bıýdjettik 115 mln teńge únemdeldi. Al arnaıy monıtorıngtik top karantın ýaqytynda dárihanalardaǵy baǵalardy tekserip, syrttan kelgen gýmanıtarlyq kómekterdiń durys bólinip, taratylýyn baqylady. Osy ýaqytqa deıin 114 sybaılas jemqorlyq táýekelderi tirkeldi. Bular negizinen ekologııa, turǵyn úı kommýnaldyq sharýashylyǵy, jer qatynastaryna jaýapty mekemelerge qatysty», - dep atap ótti Sybaılas jemqorlyqqa qarsy kúres qyzmetiniń bas mamany Evgenıı Bedychke.

Sońǵy 6 aıda jemqorlyq faktisi týraly habarlaǵan oblystyń jeti turǵynyna syıaqy berilgen. Bul maqsatta jarty mıllıon teńge jumsaldy.