Jemqorlyq týraly habarlaǵan BQO-nyń 4 turǵyny 5 mln teńge syıaqy aldy

<p>Batys Qazaqstan oblysynda bıyl sybaılas jemqorlyq týraly habarlaǵan 4 adamǵa 5 mln teńge syıaqy tólendi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

QR Sybaılas jemqorlyqqa qarsy is-qımyl agenttigi BQO boıynsha departamentiniń basshysy Ádilhan Sabýrovtyń aıtýynsha, birjolǵy aqshalaı syıaqy qylmystyń aýyrlyǵyna baılanysty 30-dan 100 AEK-ke (103 500 – 345 000 teńge aralyǵynda) deıingi mólsherde belgilenedi.

Eger para nemese keltirilgen zalal somasy 1 myń AEK-ten (3450 teńgeden) asatyn bolsa, birjolǵy syıaqy sonyń 10 paıyzyn quraıdy. Biraq 4 myń AEK-ten aspaıdy.

Departament basshysynyń sózine qaraǵanda, kótermeleý aqparattyń durystyǵy, sondaı-aq zańdy kúshine engen sot úkimi nemese ákimshilik jaza qoldaný týraly qaýly shyǵarylǵan kezde ǵana júzege asyrylady.

«Sybaılas jemqorlyqtyń kez kelgen derekteri boıynsha azamattar táýlik boıy jumys isteıtin sybaılas jemqorlyqqa qarsy qyzmettiń 1424 Call-ortalyǵyna, sondaı-aq tikeleı bizdiń departamentke júgine alady», - deıdi Á.Sabýrov.

Onyń málimetinshe, sybaılas jemqorlyqqa qarsy tıimdi is-qımyl búkil qoǵamnyń belsendi qatysýynsyz múmkin emes. Sondyqtan sybaılas jemqorlyqqa qarsy qyzmet azamattyq qoǵamdastyqpen ózara is-qımylǵa kóp kóńil bóledi. Mysaly, bıylǵy tamyz aıynan bastap elimizde «Sybaılas jemqorlyqqa qarsy volonterlik» jobasy iske asyrylýda. Mundaǵy maqsat – sybaılas jemqorlyqqa qarsy qyzmetke beı-jaı qaramaıtyn azamattardy eriktiler retinde tartý.

Batys Qazaqstan oblysynda joba iske qosylǵannan beri 132 erikti sybaılas jemqorlyqqa qarsy is-qımylǵa barynsha járdem kórsetýge nıet bildirdi, olar departament qyzmetkerlerimen birge belsendi jumys isteýde. Qoǵamdyq baqylaý aıasynda baǵany kóterý, bıýdjet qarajatyn jumsaý tıimdiligine qatysty, sondaı-aq óńirdiń problemalyq máselelerine jáne tıisti jumys sapasy joq nysandarǵa monıtorıng júrgizedi.

«Bıyl sybaılas jemqorlyqqa qarsy volonterler 19 mln teńgeden astam somaǵa baǵany kóterý táýekelderiniń aldyn aldy.

Mysaly, densaýlyq saqtaý salasyndaǵy uıym 1 dana dızel generatoryn 6 mln 910,985 myń teńge baǵamen satyp alýdy josparlaǵan bolatyn. Bul rette atalǵan taýardyń baǵasy 5 mln 530 myń teńge edi. Eriktilerdiń bastamasymen departament usynymdar engizdi, nátıjesinde uıym osy taýardy satyp alýdan bas tartty. Osylaısha, 6,9 mln teńge somasyna bıýdjet qarajatyn jumsaýǵa jol berilmedi. Taǵy bir mysal, aýdandardyń birinde demalys ortalyǵy jalpy somasy 10 dana mıksherli konsoldyń árqaısysyn 1,3 mln teńgeden satyp alýdy kózdegen. Alaıda atalǵan taýardyń quny 126 579 teńge bolatyn. Usynym negizinde atalmysh ortalyq taýardyń baǵasyn qaıta qarap, 9,2 mln teńge bıýdjet qarajatyn tıimsiz paıdalanýǵa jol berilmedi», - dedi Á.Sabýrov.