Jemqorlardan tárkilengen qarajat mektepter qurylysyna arnalǵan esepshotqa tústi

ASTANA. QazAqparat - Senattyń jalpy otyrysynan keıingi baspasóz máslıhatynda QR Premer-Mınıstri Álıhan Smaıylov jemqorlardan tárkilengen qarajatty mektep qurylysyna baǵyttaý jumystary qalaı atqarylatynyn aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes, biz zańnamaǵa, bıýdjet kodeksine arnaıy normalar ázirledik. Onda osy qarajatty aýdarý úshin Qarjy mınıstrliginde arnaıy bólek shot qarastyrylǵan. Quqyq qorǵaý organdary tıisti jumysty qamtamasyz etedi. Osy oraıda sheshim shyǵarylǵan jemqorlar boıynsha qarajat Qarjy mınıstrliginiń arnaıy shotyna túsedi», - dedi Álıhan Samılov Senattyń jalpy otyrysynan keıingi baspasóz máslıhatynda.

Úkimet basshysy bul esepshotqa qansha qarajat túskenin naqtylady.

«Qazirdiń ózinde shamamen 50 mıllıard teńge tústi, jaqyn arada bul soma 100 mıllıard teńgege deıin jetýi múmkin. Bul qarajat oryn tapshylyǵy bar jáne úsh aýysymda bilim beretin, sondaı-aq apatty jaǵdaıdaǵy mektepteri bar óńirlerde jańa nysandar salýǵa baǵyttalady», - dedi Álıhan Smaıylov.

Qazirgi kezde Oqý-aǵartý mınıstrligi bul baǵytta tıisti qujattamany ázirlep jatyr.

Aıta keteıik, bıyl qyrkúıek aıyndaǵy Joldaýynda Memleket basshysy jemqorlardyń zańsyz tapqan qarjysy olar sottalǵan soń memleketke ótip, túgeldeı mektep qurylysyna jumsalýy tıis ekenin aıtty.

«Úkimet osy bastamany zań turǵysynan rásimdeý týraly sheshim qabyldaýy kerek», - dedi Qasym-Jomart Toqaev.