Jemqor sózdigi: Antıkor qazaqstandyq jemqorlardyń súıikti sózderin jarııalady

<p>ASTANA. KAZINFORM &ndash; Qazaqstannyń sybaılas jemqorlyqqa qarsy qyzmeti para berý kezindegi eń kóp taralǵan sózder, sóz tirkesteri, ym-ısharalar men áreketter týraly aıtyp berdi.</p>

Bul sózder men is-áreketter sybaılas jemqorlyqqa qarsy is-qımyl jelisi boıynsha jedel-izdestirý is-sharalary men jasyryn tergeý is-qımyldary kezinde anyqtalǵan.

Bul rette Antıkor ár jaǵdaıdy jeke qarastyrý qajettigin atap ótti. Sybaılas jemqorlyq naqty jaǵdaıǵa baılanysty ártúrli tirkester men jaǵdaılardan keıin paıda bolýy múmkin.

Osylaısha, eń kóp taralǵan sózder men sóz tirkesteri: «Osy máseleni sheship berińizshi», «bizdiń de paıdamyz tıer», «rahmet aıtamyn ǵoı», «kóremiz», «habarlasamyz ǵoı», «sheshýge bolady, biraq naqty eshteńe aıta almaımyn», «múmkindigińizdi paıdalansańyzshy», «kelisemiz ǵoı», «qashan, qaıda baryp, ne isteý kerektigin aıtasyz ǵoı», «jaqsy jańalyqpen qýantasyz dep oılaımyn».

Eń jıi qoldanylatyn is-qımyldar: saýsaqtaryn ysqylaý, bas ızeý, kózben ymdaý, qaltasyn qaǵý, uıaly telefon, kalkýlıator arqyly somany kórsetý, qol alysý.

Syılyq para bolyp sanala ma?

Sonymen birge Antıkor qandaı jaǵdaılarda syılyqtar nemese qyzmetter para bolyp sanalmaıdy, degen suraqqa jaýap berdi.

«Memlekettik qyzmetshiler men olardyń otbasyna syılyq berýge tyıym salatyn zańnamalyq normalar bar. Eger memlekettik qyzmetshige syılyq berý olardyń qyzmetimen baılanysty bolmasa, múddeli emes uıymdar men jeke tulǵalardan syılyq alýǵa jol beriledi. Al eger syılyq berý men sheneýniktiń belgili bir is-áreketi arasynda sebep-saldarlyq baılanys ornatylsa, onda bul sybaılas jemqorlyqqa qarsy shekteýlerdi buzý dep tanylady», - dep túsindirdi sotqa deıingi tergeý qyzmetiniń basshysy Qanat Súleımenov Kazinform agenttiginiń resmı saýalyna.

Ol syılyq alý jáne berý úshin ákimshilik jaýapkershilik qarastyrylǵanyn eske saldy. Eger syılyq zańsyz áreketter nemese áreketsizdikter úshin berilse, quny 2 AEK-ten (7 384 teńge) assa jáne aldyn ala ýaǵdalastyq bolsa, qylmystyq jaýapkershilik kózdeledi.

Qanat Súleımenov memlekettik qyzmetshi jumys ornyndaǵy ústelinen para tapsa, ne isteý kerektigin túsindirdi.

«Memlekettik qyzmetshi dereý mundaı quqyqbuzýshylyqtyń aldyn alý jáne toqtatý boıynsha qajetti shara qabyldaýy kerek. ıAǵnı memlekettik qyzmetshi quqyq qorǵaý organdaryna (sybaılas jemqorlyqqa qarsy qyzmettiń call-ortalyǵy 1424 jáne 102) júginýge jáne tikeleı basshyny dereý habardar etýge, sondaı-aq faktini qujattaý úshin áriptesterin kýá retinde shaqyrýǵa tıis», - dedi spıker.