Jemqor qyzmetkeri úshin kim jáne qandaı jaǵdaıda otstavkaǵa ketedi
«Ortalyq memlekettik organnyń basshysy (mınıstrler, agenttikterdiń tóraǵalary, Prezıdentke tikeleı baǵynatyn jáne esep beretin memlekettik organdardyń tóraǵalary) óziniń orynbasary, ózine tikeleı baǵynyshty memlekettik saıası qyzmetshi, jaýapty hatshy, apparat basshysy ne ortalyq memlekettik organnyń oblystyq, respýblıkalyq mańyzy bar qalanyń nemese astananyń aýmaqtyq bólimshesiniń basshysy sybaılas jemqorlyq qylmys jasaǵan kezde otstavkaǵa beredi», - dedi QR MQІA Memlekettik qyzmet salasyndaǵy baqylaý departamentiniń dırektory Erlan Saparov.
Onyń aıtýynsha, ortalyq memlekettik organ basshylarynyń orynbasarlary ózi jetekshilik etetin vedomstvonyń, derbes qurylymdyq bólimsheniń basshysy sybaılas jemqorlyq qylmys jasaǵan kezde jumystan shyǵýǵa ótinish beretin bolady.
Otstavkaǵa ketý týraly mindet ótken jyldyń 10 jeltoqsanynan keıin sybaılas jemqorlyq qylmys jasaǵan qyzmetkerlerdiń basshylaryna jáne saıası qyzmetkerlerge qoldanylady. Memlekettik saıası qyzmetshiler, eger olar taǵaıyndalǵan kúnnen bastap úsh aı ótkennen keıin sybaılas jemqorlyq qylmys jasalǵan jaǵdaıda otstavkaǵa ketedi.
Saıası qyzmetshiler sottyń aıyptaý úkimi zańdy kúshine engennen keıin nemese sot álde qylmystyq qýdalaý organy qylmystyq isti Qazaqstan Respýblıkasy Qylmystyq is júrgizý kodeksiniń 35-baby birinshi bóliginiń 3), 4), 9), 10), 11) 12) jáne 12) tarmaqshalarynyń nemese 36-baby negizinde qysqartqan soń 10 kúntizbelik kún ishinde otstavkaǵa beredi.
Basshylardyń jaýapkershiligin qaraý kezinde kórsetilgen sharttardan basqa, qol astyndaǵylarǵa jasalǵan sybaılas jemqorlyq qylmysy men basshynyń sybaılas jemqorlyq quqyq buzýshylyq jasaýdyń aldyn alý jónindegi laýazymdyq mindetterin oryndamaýdaǵy nemese tıisinshe oryndamaýdaǵy kinási arasynda baılanystyń bolýy da mańyzdy.