Jem ózenine batqan eki adamdy qutqarǵan atyraýlyq marapattaldy
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa bıylǵy 4 maýsymda bolǵan.
«Jylyoı aýdanyndaǵy Turǵyzba aýylynan bir otbasy Jem ózenine shomylýǵa barǵan. Bul otbasynda 3 eresek, 1 ul, 3 qyz bolǵan. Shomylý kezinde 13 jastaǵy Ernaz jaǵalaýdan alysqa uzap, shuńqyrǵa batqan. Іnisiniń kómek suraǵan daýysyn estigen aǵasy, 1998 jylǵy Eldos birden kómektesýge umtylady. Alaıda inisin qutqarýǵa tyrysqanymen, ózi de bata bastaıdy. Jaǵalaýda turǵan 2000, 2008, 2006 jylǵy apaly-sińlili Aısana, Dana jáne Merýert bir-biriniń qolynan ustap, sýǵa batqan baýyrlaryna kómektesýge talpynady. Biraq alda kele jatqan Aısananyń aıaǵy qurysyp, baýyrlaryna jete almaǵan», - dep habarlady departamenttiń qoǵammen baılanys toby.
Sol sebepten Aısana aıqaılap, kómekke shaqyrǵan. Onyń daýysyn kilem jýyp jatqan zaıybyna kómektesip júrgen Manarbek Qartbaev estigen. Ol jaǵalaýǵa jedel jetip, ózenge batqandardy qutqarý úshin sýǵa sekirgen.
«Manarbek Qartbaev aldymen sýǵa batqan Ernazdy, keıin Eldosty qutqaryp qaldy. Keıin úsh qyzdyń jaǵalaýǵa jetýine kómegin berdi. Jedel áreket etken Manarbek Jaımanuly bir otbasynyń eki adamynyń ómirin saqtap qaldy. Oǵan Tótenshe jaǵdaılar mınıstrliginiń «Sýǵa batqandardy qutqarǵany úshin» medali tapsyryldy», - dep málim etti departamenttiń qoǵammen baılanys tobynan.
Eske sala ketelik, buǵan deıin Atyraýda tyıym salynǵan jerde shomylǵan er adam Jaıyqqa batyp ketkenin jazǵan edik.