Jeltoqsannyń basynda teńge nyǵaıdy - Ulttyq bank tóraǵasy
Eksporttaýshylardyń salyq tólemderin júzege asyrý úshin shetel valıýtasyn satý esebinen ósken ishki usynys pen qolaıly ishki konıýnktýra bıylǵy qarashada aıyrbas baǵamynyń bir AQSh dollary úshin 432,66-dan 425,07 teńgege deıin 1,8 paıyzǵa nyǵaıtýǵa yqpal etti», - dedi Erbolat Dosaev Úkimet otyrysynda.
Ulttyq bank basshysy birneshe vaktsınanyń sátti synaqtary týraly habarlar men AQSh-taǵy prezıdenttik bılikti resmı berýdiń bastalýy táýekeldi aktıvterge suranysty arttyrǵanyn atap ótti. Osylaısha, qarasha aıynda munaı baǵasy barreline 37,5 dollardan 47,6 dollarǵa deıin 27%-ǵa ósken.
OPEK+ óndirýdiń meılinshe qalypty qarqynmen ulǵaıtý sheshiminen keıin jeltoqsanda munaıǵa baǵa belgileý senimdi ósip keledi. AQSh dollary ındeksiniń tómendeýi damýshy elder valıýtalarynyń dınamıkasyna oń áserin tıgizdi. Máselen, Brazılııa realy bir aıda 6,6%, Túrik lırasy – 6,2%, Reseı rýbli – 3,7%-ǵa deıin nyǵaıdy», - dep atap ótti E. Dosaev.
Kepildik transfert sheńberinde Ulttyq qor aktıvterin konvertatsııalaý jáne kvazımemlekettik sektor kompanııalarynyń eksporttyq valıýtalyq túsiminiń bir bóligin mindetti túrde satýy bıylǵy qarashada valıýta naryǵynyń teńgerimde bolýynyń qosymsha faktory boldy.
«Aı basynan beri aıyrbastaý baǵamy 1,2%-ǵa nyǵaıyp, 9 jeltoqsanda bırjadaǵy saýda-sattyq qorytyndysy boıynsha bir AQSh dollary úshin 419,92 teńge boldy», - deıdi Ulttyq bank tóraǵasy.