Jeltoqsannan bastap Qaraǵandyda jolaqy tóleýdiń elektrondy júıesi iske qosylady

QARAǴANDY. QazAqparat – Qaraǵandyda ONAY qyzmet kórsetý ortalyǵy ashyldy. Kompanııa qyzmetkerleri halyqqa jol júrý aqysyn tóleý kartalaryn resimdeý, toltyrý jáne qaıta shyǵarý boıynsha konsýltatsııalyq jáne praktıkalyq kómek kórsetýge daıyn, dep habarlaıdy QazAqparat tilshisi.

«Qaraǵandynyń avtobýs parkteri ONAY Almaty kompanııasymen qyzmet kórsetý týraly shart jasasty. Bul kompanııany tańdaýǵa Almatyda jol aqysyn elektrondy túrde tóleý júıesi tabysty engizilýi túrtki boldy. Biz júıeni engizý merzimderin, tóleýdiń balamaly tásilderiniń bolýyn, kólik kartalarynyń teńgerimin birden tolyqtyrý máselesin zerdeledik», – dep atap ótti Qaraǵandy ákimi Ermaǵanbet Bólekpaev.

Elektrondy jolaqy tóleý júıesin osy jyldyń jeltoqsan aıynda iske qosý josparlanyp otyr.

Bul rette Qaraǵandyda saralanǵan tarıf aqpan aıynan bastap qoldanyla bastaıdy.

Eger ONAY kartasyn paıdalanǵan kezde jol júrý quny 80 teńge bolsa, qolma-qol aqshamen tólegen kezde jolaýshylarǵa 150 teńge tóleýge týra keledi.

5 qazannan bastap ONAY biryńǵaı kartalaryn satý núkteleri OÁD, «Taır» SOO, Maıqudyqtaǵy «Umaı» SÚ, Ońtústik-Shyǵystaǵy «Raha» SÚ, sondaı-aq Manýılskıı kóshesi,17a Halyq bankiniń ǵımaratynda jáne Prıshahtınskidegi «ıÝma» sýpermarketinde ashylady.

Kelýshiler kartalardy satyp alyp qana qoımaı, jeńildik kartasyn rásimdeı alady.

Karta quny – 500 teńge. Teńgerimde bir sapar aqysy bolady.

«ONAY kompanııasy kólik kartalarynyń tórt túrin júzege asyrady. Bul «Biryńǵaı» – barlyq azamattar úshin. «Áleýmettik», ony 20-ǵa jýyq jeńildik sanattarǵa ıe azamattar paıdalana alady. Ol tegin beriledi. Jáne «Zeınetker» kartasy. Bul kartany paıdalanýshylar alatyn zeınetaqy mólsheri 21 AEK-ten asatyn zeınetkerler bolyp tabylady. Sondaı-aq, «7-15 jastaǵy balalar» kartasy bar. Ol oqý ornynda jaýapty tulǵamen rásimdeledi jáne beriledi. 1 jeltoqsanǵa deıin ony tegin alýǵa bolady. Balalar kartasy boıynsha jol júrý quny – 40 teńge», – dep habarlady Almaty qalasy kólik holdınginiń dırektory Sadır Hamraev.

Paıdalanýshylar ONAY kartalaryn ınternet-bankıng jáne termınal, sondaı-aq ONAY mobıldi qosymshasy arqyly tolyqtyra alady.

Avtobýstarda jol júrý aqysyn birneshe jolmen tóleýge bolady. Kartalardy paıdalaný jáne tolyqtyrý erejeleri týraly tolyq aqparatty ONAY.KZ saıtynan nemese kompanııanyń sall-ortalyǵynan (8-7212) 50-60-50 nómiri boıynsha bilýge bolady.

«Bógde kompanııanyń kólik kartalary bar (Smart Card) Qaraǵandy turǵyndary olardy bizdiń qyzmet kórsetý ortalyqtarymyzda tegin aıyrbastaı alady. Ol úshin ózińizben birge jeke kýáligińiz bolýy jáne qaıta shyǵarý týraly ótinish toltyrýyńyz qajet. Bizdiń kartamyzdyń basty ereksheligi – Qaraǵandy turǵyndary olardy Almatyda, al almatylyqtar, kerisinshe, Qaraǵandyda paıdalana alady», – dep tolyqtyrdy Sadır Hamraev.

ONAY qyzmet kórsetý ortalyǵy Kommýnalnaıa kóshesi, 3 mekenjaıynda ornalasqan.