Jeltoqsanda koronavırýs juqtyrý 2,3 ese artty – mınıstrlik

ASTANA. QazAqparat – Qazaqstanda sońǵy aıda koronavırýs ınfektsııasynyń taralýy artty. Jeltoqsan bastalǵaly 5 myńnan astam adam atalǵan vırýsty juqtyryp otyr. Osy oraıda qandaı shekteý sharalary engizilýi múmkin? Saýalǵa QR Densaýlyq saqtaý vıtse-mınıstri Aıjan Esmaǵambetova jaýap berdi, dep habarlaıdy QazAqparat tilshisi.

«Jeltoqsan aıynda qarashamen salystyrǵanda koronavırýs juqtyrý kórsetkishi 2,3 ese artty. Qarashada 2169 jaǵdaı, jeltoqsanda 5127 jaǵdaı tirkelip otyr. Epıdemıologııalyq jaǵdaıdy baqylaý matrıtsasyna sáıkes 12 tamyzdan bastap barlyq óńirler jasyl aımaqta. Alaıda, elimizdiń 13 óńirinde R kórsetkishiniń joǵarylaýy baıqalady. Bul ınfektsııa taralýynyń óskenin kórsetip otyr.

Mınıstrliktiń atyna atalǵan indettiń taralýy boıynsha shekteý sharalaryna qatysty kóptegen suraqtar kelip túsedi. Qoldanystaǵy shekteý sharalaryna sáıkes, R kórsetkishi 1-den joǵary deńgeıge jetkende shekteý sharalary engiziledi. Atap aıtsaq, halyq kóp jınalatyn oryndarda maska taǵý», - dedi Aıjan Esmaǵambetova Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq vıtse-mınıstr COVID-19-dan saqtanýdyń jalǵyz amaly vaktsına alý ekenin eske saldy.

«Búginde halyqtyń 70,5% vaktsına aldy. Revaktsınatsııadan 1,2 mln adam nemese halyqtyń 54,8% ótti. Táýligine orta eseppen 120 adam koronavırýsqa qarsy ekpe alyp jatyr. Qazir elde 98 myń QazVac, 306 myń Sinofarm jáne 71 myń doza Pfizer vaktsınasy bar», - deıdi ol.