Jeltoqsanda Baıqońyrdan 3 zymyran-tasyǵysh ushyrylmaq

BAIQOŃYR. QazAqparat – 2021 jyldyń sońǵy aıynda Baıqońyr ǵarysh aılaǵynan 3 ushyrylym jasaý josparlanyp otyr, dep habarlaıdy QazAqparat tilshisi.

Eske sala ketsek, 2021 jyldyń 24 qarashasynda «Progress M-ÝM» kóliktik júk kemesi men «Prıchal» túıindi modýli bar «Soıýz-2.1b» zymyran-tasyǵyshy sátti ushyryldy. «Prıchaldyń» Halyqaralyq ǵarysh stantsııasymen sátti túıisýin Nur-Sultan ýaqytymen saǵat 20:30-dan bastap roscosmos.ru saıtynan kórýge bolady. Bul – jyl basynan beri Baıqońyr ǵarysh aılaǵyndaǵy esep boıynsha 11-shi ushyrylym.

Josparǵa sáıkes, 2021 jyldyń jeltoqsanynda Baıqońyrdan taǵy 3 ushyrylym belgilengen. 2021 jyldyń 8 jeltoqsanynda «Soıýz MS-20» kóliktik basqarylatyn kemesi bar «Soıýz-2.1a» zymyran-tasyǵyshyn ǵaryshqa jóneltý kózdelgen. Ekıpajdar bir aptaǵa jýyq ýaqyt Baıqońyrda start aldyndaǵy daıarlyqtan ótip jatyr.

12 jeltoqsanda orta sanattaǵy «Ekspress-AMÝ3», «Ekspress-AMÝ»7 geostatsıonarlyq telekommýnıkatsııalyq apparattary bar «Proton-M/Brız-M» zymyran-tasyǵyshy ushyrylmaq. Al 27 jeltoqsanda Baıqońyrdan OneWeb spýtnıkteriniń kezekti partııasy tıelgen «Soıýz-2.1b» zymyran-tasyǵyshyn ushyrý belgilendi.

Avtory Sara Qabıqyzy