«Jeltoqsan» kóterilisiniń 25 jyldyǵyn joǵary deńgeıde atap ótý - bizdiń árýaqtar aldyndaǵy boryshymyz - Tólegen Áljanov

ALMATY. Shildeniń 27-si. QazAqparat /Erbol Turymbetov/ - Búgin Almatydaǵy «Qalamger» baspasóz úıinde «Jeltoqsan» kóterilisiniń bozdaqtary men saıası qaıratkerlerin eske túsirýge arnalǵan «Táýelsizdik muraty jáne jeltoqsan kóterilisiniń taǵylymy» atty otyrys ótti, dep habarlaıdy QazAqparat.

Basqosýdy «Jeruıyq» qoǵamdyq birlestigi Almaty qalasy ishki saıasat basqarmasynyń áleýmettik tapsyrysy boıynsha uıymdastyryp otyr. «El birligi - táýelsizdik kepili» jobasy aıasynda ótkizilip otyrǵan bul shara «Jeltoqsan» bozdaqtary men saıası qýǵyn-súrginge ushyraǵandardy eske alýǵa arnalǵan.

«Elimizdiń qazirgi myzǵymas birligi jeltoqsandyqtardyń eren erliginiń jemisi. Sanadan máńgi óshpeıtin Qaırat, Lázzattardyń erligi keıingi urpaq tárbıesine ónege. Kezinde qaısar qyzdyń atyna daq keltirgen málimetterdiń barlyǵy búginde jalǵan ekendigi dáleldenip otyr. Kóterilistiń aldaǵy 25 jyldyǵyn joǵary deńgeıde atap ótý - bizdiń árýaqtar aldyndaǵy boryshymyz», dedi «Jeltoqsan jańǵyryǵy» qoǵamdyq birlestiginiń tóraǵasy Tólegen Áljan. Onyń aıtýynsha, ózi basqaratyn qoǵamdyq uıym endi óz jumysyn toqtatady.

Jıynǵa «Jeltoqsan» kóterilisine baılanysty qurylǵan barlyq qoǵamdyq-saıası uıymdar basshylary men tarıhı oqıǵaǵa qatysqan kýágerler jáne jazýshylar da qatysty. Otyrys sońynda barlyq qatysýshy uıymdardyń kelisimimen ortalyq keńes qurylatyn bolyp sheshildi. Ol keńes aldaǵy ýaqytta atalmysh tarıhı oqıǵa boıynsha jumys jasaıtyn bolady. Al ony basqarý quramyndaǵy uıym basshylarynyń árqaısysyna ár ýaqytta berilip otyrady dep josparlanǵan.