Jeltoqsan aıynda jol bıtýmy zaýyty iske qosylady

ASTANA. 6 shilde. QazAqparat - 2012 jyldyń jeltoqsan aıynda «Aqtaý plastıkalyq massa zaýytyndaǵy Jol bıtým óndirisi» ınvestıtsııalyq jobasy iske qosylady, dep habarlady Munaı jáne gaz mınıstrliginiń baspasóz qyzmetinen pm.kz saıtyna.

«Búgingi tańda barlyq tehnologııalyq jabdyqtar - kolonnalar, peshter, sorǵylar, jylýalmastyrǵyshtar, ydys jáne separatorlyq jabdyqtardyń 80 paıyzy, aýamen salqyndatýshy apparattardyń 60 paıyzy jetkizildi», - delingen vedomstvo habarlamasynda.

Jobanyń barlyq nysandarynyń qurylysy 2012 jyldyń jeltoqsan aıynyń sońyna qaraı aıaqtalady dep josparlanýda.

Atap aıtqanda, aǵymdaǵy jyldyń mamyr aıynda qubyr jáne armatýra ónimderiniń alǵashqy partııasy (qajetti barlyq kólemniń 25 paıyzy), sorǵy jabdyqtary, temirjol jáne avtoquıý estakadalary, vertıkaldy bolat rezervýarlarǵa arnalǵan jabdyqtar jetkizildi.

Mınıstrliktiń aqparaty boıynsha,  nysannyń tehnologııalyq aýmaqtary boıynsha  jabdyqtar men tehnologııalyq etajerkalardyń jáne estakadalardyń montajdaý jumystary júrgizilýde.

Oǵan qosa,tehnologııalyq kolonnalar men peshterdiń irgetastary -100 paıyzǵa, jylýalmastyrǵyshtar men ydys jabdyqtary - 80 paıyzǵa, etajerkalar - 70 paıyzǵa, qubyr estakadasy - 50 paıyzǵa qurastyryldy, sondaı-aq qubyr toraptary men sektsııalardy daıarlaý úshin qurastyrý alańdary ázirlendi, bıtýmdi modıfıkatsııalaý jáne syǵymdaý tehnologııalyq bloktarynyń irgetasyn qondyrý jónindegi qurylys jumystary atqaryldy.

Al, jalpy zaýyt sharýashylyǵynyń nysandaryna keler bolsaq, rezervýarlar, daıyn ónimder saqtalatyn qoımalar qurastyrylyp, gıdrosynaqtan ótkizildi, rezervýar parkteriniń, avtoquıý stansalarynyń tehnologııalyq bekitkishteri, ınjenerlik jeliler men kommýnıkatsııalar, tseharalyq tehnologııalyq jáne kabeldik estakadalar salynýda.

Bul zaýyt ÚIID baǵdarlamasynyń iri munaı-hımııalyq jobalarynyń biri bolyp tabylady.