Jeltoqsan aıynda Ult tarıhyn zerdeleý boıynsha baıandama Elbasyna usynylatyn bolady
17:05, 28 Maýsym 2013
ASTANA. 28 maýsym. QazAqparat - Aǵymdaǵy jyldyń jeltoqsanynda «Tarıh tolqynyndaǵy halyq» baǵdarlamasy boıynsha Ulttyq tarıhty zerdeleý máseleleri jónindegi komıssııa jumysynyń naqty baǵyttary Memleket basshysyna baıandalýy qajet. Bul týraly búgin Aqordada Ulttyq tarıhty zerdeleý máseleleri jónindegi vedomstvoaralyq jumys tobynyń ekinshi otyrysy barysynda QR Memlekettik hatshysy Marat Tájın málim etti.
«Men bizdiń mazmundy jumysymyzdyń basym bóligi aǵymdaǵy jyldyń jeltoqsan aıyna deıin aıaqtalýy qajettigine Sizderdiń nazarlaryńyzdy aýdarǵym kelip otyr. Aǵymdaǵy jyldyń jeltoqsan aıynda komıssııa tarapynan Memleket basshysynyń atyna bizdiń jumysymyzdyń naqty baǵyttaryn belgileıtin arnaıy baıandama ázirleýimiz qajet. Bul - óte kúrdeli ári keshendi jumys. Sózden naqty iske kirisý qajet», - dedi M.Tajın.
Otyrys barysynda «Tarıh tolqynyndaǵy halyq» baǵdarlamasyn ázirleý boıynsha ýákiletti memlekettik organdardyń atqaryp jatqan sharalary talqylandy.