Jelige pornografııalyq fotosýretterin jarııalaǵan 24 jastaǵy kókshetaýlyq isti boldy

KÓKShETAÝ. QazAqparat - Áleýmettik jelige pornografııalyq fotosýretterin jarııalaǵan Kókshetaý qalasynyń 24 jastaǵy turǵyny anyqtalyp, ústinen qylmystyq is qozǵaldy, dep habarlaıdy QazAqparat tilshisi Aqmola oblystyq Polıtsııa departamentiniń baspasóz qyzmetine silteme jasap.

Vedomstvonyń málimetinshe, 9-11 aqpan aralyǵynda oblys aýmaǵynda aqparattyq tehnologııalardy paıdalana otyryp jasalǵan quqyq buzýshylyqtarǵa qarsy kúreske baǵyttalǵan «Anti-fraud» jedel aldyn alý sharasy ótti. Sharanyń basty maqsaty – áleýmettik jelilerde pornografııalyq sıpattaǵy fotolardyń taralý faktileriniń jolyn kesý. Osy rette, aqpannyń 10-da «VKontakte» áleýmettik jelisindegi ınternet-resýrstarǵa monıtorıng júrgizý barysynda belgisiz bireýdiń búrkenshik atpen Kókshetaý qalasynyń aýmaǵynda pornografııalyq sıpattaǵy fotosýretterdi taratýmen jáne jarnamalaýmen aınalysyp júrgendigi anyqtaldy.

«Jedel-izdestirý sharasy barysynda Kókshetaý qalalyq PB jedel krımınaldy bólimshesiniń qyzmetkerleri Kókshetaý qalasynyń 24 jastaǵy turǵynyn anyqtady. Ol óz kinásin moıyndady. Anyqtalǵandaı, ol óziniń jeke pornografııalyq fotosýretterin jelige ornalastyrǵan. Osylaısha ol qyzdardyń nazaryn ózine aýdarǵysy kelipti», - dedi vedomstvodan.

Qazirgi kezde, er adamnyń ústinen Qylmystyq kodekstiń 311 baby «pornografııalyq materıaldardy nemese zattardy zańsyz taratý» boıynsha sotqa deıingi tergeý sharalary júrgizilýde.