Jelidegi jalǵan aqparatqa senip jolǵa shyqqan turǵyndar qar qursaýynda qalyp jatyr

TÚRKІSTAN. QazAqparat - Jelide taraǵan aqparattarǵa sengen turǵyndar qar qursaýynda qalyp jatyr. Bul týraly Túrkistan oblysy jolaýshylar kóligi jáne avtomobıl joldary basqarmasynyń basshysy Rolan Ibragımov málimdedi, dep habarlaıdy QazAqparat tilshisi.

Búgingi kúni Túrkistan oblysynda jaýǵan qalyń qar men qatty jeldiń zardaptaryn joıý jumysy júrip jatyr.

Tótenshe jaǵdaılar departamenti tarapynan respýblıkalyq, oblystyq joldardy qardan tazartý úshin jalpy 133 adam, 74 tehnıka, al jergilikti mańyzy bar avtomobıl joldaryn qardan tazartý úshin jalpy 97 adam, 41 tehnıka kómekke jiberilgen.

«Turǵyndar resmı BAQ-ta taraǵan aqparatqa emes, taksısterdiń jelide aıtqan sózderine senip óz ómirin qaterge tigip jatyr. Keshegi kúni de «Jambyl oblysyna kóp mashınalardy ótkizip jatyr eken» dep qanshama adamdar jolǵa shyǵyp ketken. 4 qańtardaǵy málimet boıynsha qatty jaýǵan qardyń jáne burqasyn jel men boran saldarynan 8 oblystyq mańyzy bar jol ýaqytsha jabylǵan. Qar qursaýynan 103 kólik, 110 adam shyǵaryldy»,- dedi basqarma basshysy.

Sondaı-aq, Rolan Ibragımov aýa raıyna baılanysty habarlama kelgen jaǵdaıda turǵyndardyń uzaq jolǵa shyqpaýyn jáne tek resmı aqparatqa sený kerektigin jetkizdi.

Foto: gov.kz