Jelide taraǵan vıdeodan keıin referendým komıssııasynyń músheleri jumystan shettetildi

ALMATY. QazAqparat - Áleýmettik jelide bıýlletenderdi referendým komıssııasynyń músheleri ózderi toltyryp, jáshikke salyp jatqany jaıly vıdeo tarady. Osy jaǵdaıǵa baılanysty sol ýchaskeniń komıssııa músheleri ýaqytsha qyzmetinen shettetildi. Bul týraly aýmaqtyq saılaý komıssııasynyń tóraǵasy Janna Asanova málim etti , dep habarlaıdy QazAqparat tilshisi.

«Búgin ýchaskedegi buzýshylyqqa qatysty vıdeo paıda boldy. Onda komıssııa músheleri bıýlletenderdi jáshikke ózderi salyp jatyr degen boljam aıtyldy. Referendým zań normalaryn qatań saqtaýǵa negizdelgen. Protsedýralardyń buzylýyna eshqandaı jol berilmeıdi. Biz bolǵan jaıtty tolyq anyqtaý úshin ýchaskelik komıssııa múshelerin mindetinen shettetý týraly sheshim qabyldadyq. Óıtkeni, bizde jáne joǵary turǵan komıssııada vıdeonyń negizinde is-áreketti baǵalaıtyn ókilettik joq. Ýchaskelik komıssııa múshelerimen sóılesken kezde olar laqtyrý faktisin joqqa shyǵarady»,-dedi spıker.

Janna Asanova jáshikti mórlep, daýys berýdi basqa, statsıonarlyq jáshikpen jalǵastyrý týraly sheshim qabyldanǵanyn jetkizdi.

«Bıýlleten laqtyrylǵan ýrnadaǵy barlyq bıýlleten jaramsyz dep tanyldy. Onyń aldynda salynǵan bıýlletender, ókinishke qaraı, sanaǵan kezde esepke alynbaıdy. Bolǵan jaǵdaıdyń zańdylyǵyna quqyq qorǵaý organdary men ortalyq saılaý komıssııasy baǵa beredi. Óıtkeni nátıjeni joıý, toqtata turý máselesi tek ortalyq saılaý komıssııasynyń quzyretine jatady. Qujattardy sol jerge beremiz»,- dedi ol.