Jelide qańtardaǵy oqıǵalar kezinde túsirilgen jańa vıdeo tarady

NUR-SULTAN. QazAqparat - Áleýmettik jelide qańtardaǵy oqıǵalar kezindegi buzaqylardyń dúkenderdi qıratyp, tonap jatqan sáti túsirilgen vıdeo paıda boldy, dep habarlaıdy QazAparat.

Kadrda buzaqylardyń avtomobıl trosy arqyly dúkenderdiń esigi men terezesin buzyp, saýda ortalyǵyna kirip jatqany beınelengen. Sondaı-aq, zergerlik jáne basqa da bólimderdi qıratyp jatqany túsip qalǵan. Aıta keteıik, ІІM-degi qańtardaǵy oqıǵalarǵa qatysty óndiristegi isterdiń basym bóligin urlyq pen tonaý quraıdy. Osy iske qatysy barlardy vıdeokameralarǵa taldaý jasaý arqyly anyqtap jatyr.

Eske salaıyq, 1 qańtarda Mańǵystaý oblysy Jańaózen qalasynda saǵat 17:20-da qala ákimdiginiń aldynda turǵyndar jınaldy. Olar el basshylyǵyna vıdeoúndeý jasap, suıyltylǵan gaz baǵasyn túsirýdi surady.

Sol kúni saǵat 18:00-de adamdar tarady. Sodan keıin 2 qańtarda narazylyq bildirýshiler sany birneshe júzdegen adamǵa artty, al aktsııaǵa qatysýshylar ishki joldy japty. Quqyq qorǵaý organdary kúsh qoldanǵan joq.

3 qańtardan bastap narazylyq bildirýshiler basqa qalalarda jáne óńirlerde shyǵa bastady. Sol kúni Mańǵystaý oblysynyń turǵyndaryn qoldaý maqsatynda basqa jeti óńirde - Atyraý, Aqtóbe oblystary, Nur-Sultan, Almaty qalalary, BQO, Almaty oblysy men ShQO-da «beıbit» mıtıngter bastaldy.

4 qańtarda mıtıngiler jalǵasty, al oǵan qoldaý bildirgen óńirler sany 11-ge jetti. Qatysýshylar sany 37 myń adamǵa deıin ósti. Almaty men Shymkentte qarýly shabýyldar jasaldy.

Qańtardaǵy oqıǵalardyń tolyq hronologııasymen myna siltemeden tanysýǵa bolady.