Jelide dezınfektor-urylar týraly aqparat paıda boldy

NUR-SULTAN. QazAqparat – WhatsApp jelisinde dezınfektor qyzmetkeriniń kıimin kıgen urylar týraly aýdıojazba tarap jatyr. Polıtseıler bul aqparattyń shyndyqqa janaspaıtynyn málimdedi, dep habarlaıdy QazAqparat.

«Bul – jalǵan aqparat, feıkti taratqan qaskóılerdiń qoǵamda negizsiz dúrbeleń men qorqynysh taratýdy maqsat etip otyrǵany anyq. Osyǵan baılanysty, jalǵan habarlamanyń avtorlary mindetti túrde tabylyp, jaýapqa tartylatynyn málimdeımiz», - dedi Almaty qalasy Polıtsııa departamentiniń resmı ókili Saltanat Ázirbek.

Polıtsııa memlekettik organdardyń resmı aqparatyna ǵana súıenýdi, messendjerler men áleýmettik jelilerdegi túrli málimetterge kúmánmen qaraýdy jáne bul aqparatty taratýmen aınalyspaýdy usyndy.

«Bul áreketter QR Qylmystyq kodeksiniń 274-babynyń 2-bóligine sáıkes qylmystyq jaýapkershilikke ákep soǵady, ol úshin eki jyldan bes jylǵa deıin bas bostandyǵynan aıyrý túrinde jaza taǵaıyndalady», - dedi S. Ázirbek.