Jelide AQSh-tyń eks-prezıdenti Donald Tramptyń túrmedegi sýreti paıda boldy

LONDON. QazAqparat - Donald Tramp Djordjııa shtatynyń Atlanta qalasyna kelip, jergilikti bılikke ózi berildi. Ony qamaýǵa alyp, túrme tizimine tirkedi. Oǵan 2020 jyly shtattaǵy saılaý nátıjelerin joıǵysy keldi degen aıyp taǵylyp otyr, dep habarlaıdy QazAqparat VVS-ge silteme jasap.

Osylaısha Tramp magshot jasaǵan, ıaǵnı túrme sýretine túsken jalǵyz AQSh-tyń eks-prezıdenti atandy.

Ol Atlanta túrmesinen shyǵý úshin 200 000 dollar (160 000 fýnt strelıng) kóleminde kepil tóleýge májbúr boldy. Qazir sotty kútip otyr.

Sodan keıin ol bul isti «ádil sotqa parodııa» dep atady.

Tramp keıingi bes aıda tórtinshi ret tutqyndalyp tur.

2021 jyldyń qańtarynan beri alǵash ret Aq úıdiń burynǵy basshysy Twitter degen atpen tanymal bolǵan H áleýmettik jelisinde jazba jarııalady. Ol óziniń veb-saıtynyń mekenjaıyn jazyp, túrmedegi sýretin júktedi. Sýretke qosymsha bas áriptermen «Saılaýǵa aralasý. Eshqashan berilmeńiz!» dep jazdy.

Keı basylymdar eks-prezıdent Tramptyń bul sýreti tarıhqa enedi dep jazdy. «Bul sýretti jaqyn arada kofe saptyaıaǵynan, qalpaq, jeıde jáne basqa da birtúrli taýarlardyń syrtynan kóretinińizge senimdimin», - dep jazdy CNN jýrnalısi.

Magshottar Elvıs Preslı, Frenk Sınatra, Al Kapone jáne d-r Martın Lıýter Kıng-kishi syndy tanymal amerıkalyq qoǵam qaıratkerlerinde bolǵan.

Tramp polıtsııada shamamen 20 mınýttaı boldy. Kóshede onyń ondaǵan jaqtasy jınaldy.

Úıine ketpes buryn ol áýejaıda jýrnalısterge daýys berý nátıjesine kelispeýge quqyly ekenin aıtty.

Ótken aptada Trampqa basqa da 18 aıyptalýshymen birge Baıdennen 12 000 daýysqa jeńilgeni belgili bolǵannan keıin Djordjııa shtatyndaǵy saılaý nátıjelerine aralaspaq boldy degen aıyp taǵyldy.

Trampqa taǵylǵan 13 aıyptaýdyń ishinde bopsalaý, laýazymdy tulǵany antyn buzýǵa arandatý, jalǵan kýálik berý bar.

Tramp ózine taǵylǵan aıyptyń bárin joqqa shyǵarady.