Jeksen Aısyn: Óner adamdaryn qoldaý — tutas qoǵamǵa jasalǵan qamqorlyq
«Barshańyzdy búgingi mádenıet pen óner qyzmetkerleri kúnimen shyn júrekten quttyqtaımyn! Sizdiń qolyńyzdan marapat alý men úshin qýanyshty sát ári bıik mártebe. Mádenıet salasy árdaıym sizdiń nazaryńyzda ekeni erekshe qýantady. Óner adamdarynan bildirilgen qoldaý túptep kelgende tutas qoǵamǵa jasalǵan qamqorlyq dep túsinemiz. Elimizdiń basty mýzeılerine ulttyq mártebe berý týraly sizdiń tapsyrmańyz tól rýhanııatqa degen úlken qurmet. Bizder — mádenıet salasynyń qyzmetkerleri urpaqtan-urpaqqa jalǵasyp kele jatqan ulttyq qundylyqtarymyzdy saqtap, damytýǵa bar kúsh-jigerimizdi jumsaı beremiz», — dedi Jeksen Aısyn.
«Eren eńbegi úshin» medalimen marapattalǵan A. Jubanov atyndaǵy daryndy balalarǵa arnalǵan respýblıkalyq qazaq mamandandyrylǵan mýzyka mektep-ınternatynyń aǵa oqytýshysy Murat Bısenǵalıev shyǵarmashylyq qaýym qoǵam damýy men tutastyǵy jolynda qajyrly qyzmet etýge daıyn ekendigin aıtty.
«Mádenıet — qoǵam ómiriniń aınasy, sarqylmaıtyn qazyna, baǵa jetpes qundylyq. Kóp jyl boıy halqymyzdyń ónerin dáriptep, odan ary ósip-órkendeýine atsalysyp kelemiz. Bolashaqta ıgi isterdi jalǵaıtyn talanatty shákirtter tárbıelep júrmiz. Qazaq ulttyq óner ýnıversıteti endi halqymyzdyń bulbul ánshisi Kúlásh Baıseıitovanyń esimimen atalady. Bul qazaqtyń birtýar ónerpazyna degen qurmet qana emes, tarıhı sanany jańǵyrtý ári keleshek urpaq úshin sabaq bolarlyq bastama dep sanaımyn. Shyǵarmashylyq qaýym qoǵam damýy men tutastyǵy jolynda qajyrly qyzmet etýge árdaıym daıyn. Tól ónerimiz órkendep, mádenıetimiz bıik bola bersin!» — dedi ol.