Jekeshelendirýge shyǵarylǵan TOP nysandar baǵalaý qunynan 1,5 mlrd teńge qymbatqa satylýda

ASTANA. QazAqparat - Aǵymdaǵy jyly jekeshelendirilýi josparlanǵan barlyq TOP nysan 1 qarashaǵa deıin saýda-sattyqqa shyǵarylatyn bolady. Bul týraly búgin Úkimettiń selektorlyq rejimdegi otyrysynda QR Qarjy mınıstri Baqyt Sultanov aıtty, dep habarlaıdy QazAqparat. 

«2017 jylǵa 24 top nysandy, onyń ishinde Ulttyq holdıngterdiń 20 nysanyn jáne respýblıkalyq menshiktegi 4 nysandy satý josparlanǵan bolatyn. Olardyń ishinde búgingi tańda 6 nysan satyldy jáne 11 nysan saýda-sattyqta», -  dedi mınıstr.

Onyń aıtýynsha, ótken kezeń ishinde satylǵan top nysandarǵa jasalǵan taldaýǵa sáıkes satý baǵasy olardyń baǵalaý qunynan 3 paıyzǵa nemese shamamen 1,5 mlrd teńgege, al olardyń balanstyq qunynan 90 paıyzǵa, ıaǵnı 23 mlrd. teńgege  artyq ekendigin kórsetken.

«Respýblıkalyq menshiktegi 4 top nysan boıynsha jumys Jol kartalarynda kórsetilgen is-sharalarǵa sáıkes júrgizilýde. Jalpy, nysandardy satý bekitilgen Kestelerge sáıkes júzege asyrylýda jáne aǵymdaǵy jylǵa josparlanǵan barlyq obektiler 1 qarashaǵa deıin saýda-sattyqqa shyǵarylatyn bolady», -  dedi Baqyt Sultanov.