Jekeshelendirýdiń keshendi josparynyń 90 paıyzyn oryndaý qajet – Úkimet basshysy

ASTANA. QazAqparat – Bıyl jekeshelendirýdiń keshendi josparynyń 90 paıyzyn oryndaý qajet. Bul týraly búgin Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

Ekonomıkalyq saıasattaǵy basymdyqtardyń biri – memlekettiń ekonomıkadaǵy úlesin birtindep qysqartý jáne barlyǵyna teń múmkindikter berý. Bul keshendi jekeshelendirý jáne memleketke tán emes fýnktsııalardy básekeles ortaǵa berý arqyly iske asyrylýy tıis. Biz memlekettiń ekonomıkadaǵy úlesin Jalpy ishki ónimniń 14,4 paıyzyna deıin qysqartýymyz kerek. Bıyl jekeshelendirýdiń keshendi josparynyń 90 paıyzyn oryndaý qajet», - dedi Premer-Mınıstr.

Onyń atap ótýinshe, ınfraqurylymdy jańǵyrtý boıynsha aýqymdy jumys kútip tur.

«Tozyǵy jetken elektr, jylý jáne sýmen jabdyqtaý jelilerin azaıtý úshin túpkilikti sharalar qabyldaýymyz kerek. «Investıtsııa ornyna tarıf» baǵdarlamasyn sapaly iske asyrýdy qamtamasyz etý qajet. Turǵyn úı-kommýnaldyq sharýashylyq ınfraqurylymyn jóndeý jáne rekonstrýktsııalaý boıynsha josparlanǵan barlyq ınvestıtsııalyq jobalar oryndalýy tıis», - dedi ol.