Jekeshelendirýden túsken qarjy tolyqtaı Ulttyq qorǵa quıylady

ASTANA. QazAqparat - Elimizde júrgizilip jatqan memlekettik nysandardy jekeshelendirýden túsken qarjy tolyqtaı Ulttyq qorǵa salynady. Bul týraly búgin halyqpen eseptik kezdesý ótkizgen QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.«Jekeshelendirýden alynǵan kiris bıýdjetke emes Ulttyq qorǵa túsetin bolady. Bul Ulttyq qordy tolyqtyrýdyń taǵy bir kózi», - dedi ol kezdesý barysynda qoıylǵan suraqqa jaýap bere kele.

Mınıstrdiń aıtýynsha, memlekettik nysandardy jekeshelendirýden túsetin qarjynyń kólemi úlken emes. Qazirgi ýaqytta onyń naqty kólemin aıtý qıyn. Degenmen, ol birneshe mıllıard teńge kóleminde bolady.

«Qazirgi ýaqytta jekeshelendirý baǵdarlamasy aıasynda satylatyn 585 uıym qalyp otyr. Onyń 496-syn 2017 jyly, al 89-yn 2018 jyly satý josparlanǵan. Іri kompanııalary satý máselesi turaqty negizde Qazaqstan ekonomıkasyn jańǵyrtý máseleleri jónindegi memlekettik komıssııanyń otyrystarynda qaralady», - dedi ol.

Sonymen qatar mınıstr «Eır Astana», «Qazatomónerkásip» «Qazaqtelekom», «QazMunaıGaz», «Qazposhta», «Qazaqstan temir joly», «Samuryq-Energo» jáne «Taý-Ken Samuryq» kompanııalary halyqtyq ІRO-ǵa shyǵarylatyndyǵyn atap ótti.

«Atalǵan kompanııalar shyǵarylatyn basymdyqty alań retinde Astanadaǵy Halyqaralyq qarjy ortalyǵy qarastyrylyp otyr. Júzege asyrý 2018 jylǵa josparlanǵan. Bul daıyndyq jumystaryn, ońtaılandyrý sharalaryn jáne holdıngterdi transofrmatsııalaý qajettiligimen baılanysty», - dedi Súleımenov.