Jekeshelendirýden keıingi baqylaýdy kúsheıtý qajet - mınıstr
«Jekeshelendirýden keıin kásiporynnyń ári qaraıǵy qyzmetine baqylaý júrgizilýi kerek. Sebebi, obektilerdi satqan kezde satýdyń jekelegen sharttary aıqyndalýy múmkin. Mysaly, qyzmettiń profılin saqtaý; jańa jumys oryndaryn qurý nemese saqtaý; boryshty óteý; tabıǵat qorǵaý sharalaryn júzege asyrý; jekeshelendirý obektisine quıylatyn ınvestıtsııa kólemin, túrlerin men merzimderin belgileý jáne t.b.», - dep atap ótti mınıstr Súleımenov Úkimet otyrysynda.
Mınıstrdiń usynysyna sáıkes, jekeshelendirýden keıingi baqylaý jeke menshik ıelerdiń obektini basqarý tıimdiligin anyqtaý úshin básekelestik ortaǵa bergennen keıin 3-5 jyldan soń júzege asyrylýy tıis jáne bul baqylaý kvazımemlekettik sektorda da júrgizilýi tıis.
«Jekeshelendirýden keıingi baqylaý tek memlekettik menshik aktıvteri boıynsha júzege asyrylady. Kvazımemlekettik sektordyń satylǵan aktıvteri boıynsha baqylaý júzege asyrylmaıdy. Osyǵan baılanysty, ulttyq holdıngterge satý sharttarynyń oryndalýyna jáne tutas kompanııa qyzmetiniń tıimdiligine jekeshelendirýden keıingi baqylaýdy qamtamasyz etýdi odan ári oryndaýdy tapsyrý qajet», - dep óz sózin túıindedi T. Súleımenov.
Sonymen birge, Ulttyq ekonomıka mınıstri jekeshelendirý obektileriniń negizinen ekinshi jáne úshinshi saýda-sattyqtarda satylatyndyǵyn, olardyń bastapqy baǵasy aldyńǵy baǵasynan 50 paıyzǵa tómendep, memleketke shyǵyn keletinin basa aıtty.