Jekeshelendirý júıeli jáne ashyq júrgizilip jatqan joq - Prezıdent

NUR-SULTAN. QazAqparat – Jekeshelendirý júıeli jáne ashyq júrgizilip jatqan joq. Búgin Parlament Májilisiniń jalpy otyrysynda Memleket basshysy Qasym-Jomart Toqaev osylaı málim etti, dep habarlaıdy QazAqparat tilshisi.

«Ekonomıkalyq ósim memlekettiń ekonomıkadaǵy úlesin azaıtýmen tyǵyz baılanysty. Biraq jekeshelendirý júıeli jáne ashyq júrgizilip jatqan joq. Atap aıtqanda, básekelestik ortaǵa berilýi tıis aktıvterdi irikteý tásilderi aıqyndalmaǵan. Ony shuǵyl ázirleý qajet», - dedi Memleket basshysy.

Osy oraıda Prezıdent Úkimetke Básekelestikti qorǵaý jáne damytý agenttigimen birlesip, tıisti memlekettik komıssııanyń jekeshelendirýge qatysty sheshimderiniń tolyq, ashyq ári aıqyn bolýyn qamtamasyz etýdi tapsyrdy.

«Ekonomıkany ártaraptandyrý - kúrdeli mindet. Ártaraptandyrý bolmasa, azamattarymyzdyń ál-aýqatyn arttyryp, turaqty jumys oryndaryn ashý múmkin emes. Bul jumystyń basty baǵyty - óńdeý ónerkásibin damytý», - dedi Qasym-Jomart Toqaev.

Budan buryn habarlanǵandaı, Prezıdent «Samuryq-Qazyna» qory men ondaǵy sheteldik mamandardy synady.