Jekeshelendirý jospary: Jyl sońyna deıin 87 nysan saýdaǵa shyǵarylady
«Aǵymdaǵy jyldyń 1 shildesindegi jaǵdaı boıynsha, jekeshelendirýdiń keshendi josparyna engen 887 nysannyń 502-si saýda-sattyqqa shyǵarylyp, onyń 421-i satyldy. Osy nysandardyń quny 216 mlrd teńgeni qurady», - dedi QR Qarjy mınıstrligi Memlekettik múlik jáne jekeshelendirý komıteti tóraǵasynyń mindetin atqarýshy Ǵalymjan Ybyraıymov.
Onyń ishinde 26 mlrd teńgege ótkizilgen 29 múlik - respýblıkalyq menshik nysany, 49 mlrd teńgege baǵalanǵan 229 múlik - kommýnaldyq menshik nysany, 141 mlrd teńge somasyndaǵy 163 ulttyq holdıng pen kompanııa bar.
«Sonymen birge, keshendi jospardyń 63 top nysanynyń 15-si
110,5 mlrd teńgege satyldy. Onyń ishinde ekeýi - respýblıkalyq menshiktiń jáne 13-i - ulttyq holdıngterdiń menshigi bolatyn», - dedi Ybyraıymov.
Onyń aıtýynsha, bıyl alǵashqy jarty jylda 104 nysandy saýdaǵa shyǵarý josparlandy. Іs júzinde 89 nysan saýda-sattyqqa shyǵarylyp, 15 nysan boıynsha qaıta uıymdastyrý jáne taratý týraly sheshim qabyldandy. Saýdaǵa qoıylǵan nysandardyń ishinde 39-y 36 mlrd teńgege satyldy.
Memlekettik múlik jáne jekeshelendirý komıteti basshysynyń aıtýynsha, jekeshelendirý protsesi satý kestesine sáıkes júrgizilýde.
«Aǵymdaǵy jyldyń sońyna deıin 87 nysan saýda-sattyqqa shyǵarylady, onyń ishinde respýblıkalyq menshiktegi 20 nysan men kommýnaldyq menshiktegi 31 nysan, sondaı-aq kvazımemlekettik sektordaǵy 36 aktıv bar», - dep atap ótti ol.