Jekeshelendirý: Qostanaı emhanasy kezekti ret satylmaı qaldy

QOSTANAI. QazAqparat - Jekeshelendirý aıasynda saýdaǵa shyǵarylǵan Qostanaı qalasyndaǵy №2 emhana kezekti ret satylmaı qaldy, dep habarlaıdy QazAqparat oblystyq qarjy basqarmasynyń jekeshelendirý jáne jekeshelendirýden keıingi baqylaý bóliminiń jetekshisi Lıýbov Kazorınaǵa silteme jasap.

Emhanany senimdi basqarýǵa berý boıynsha ekinshi tender qatysýǵa ótinimder túspegen soń ótkizilmedi. Qarjy basqarmasynda málim etilgendeı, endi tender sharttary qaıta qaralady.

«Zań boıynsha tender sharttaryn ókiletti organ engizetindikten, biz densaýlyq saqtaý basqarmasyna suranymhat jiberdik. Olardyń usynystarynan soń kelesi satylym merzimi belgilenedi», - dedi Lıýbov Kazorına.

Aıta keteıik, №2 emhananyń bastapqy baǵasy - 644 mln teńge.  Tender sharty boıynsha, nysan 3 jylǵa senimdi basqarýǵa beriledi. Sondaı-aq, jańa basshy kem degende 500 mln teńge ınvestıtsııa salýy tıis. Endi aqpan aıynda ótetin komıssııa otyrysynda úshinshi tenderdiń sharttary men ýaqyty anyqtalady.